🏠 👥 🔍 🧩 🅰️ 📌 ↩️

الشیخ محمد فاروق رفیع حفظہ اللہ
فوائد:
➊ اسلام کے بنیادی ارکان، جن پر اسلام کی عمارت استوار ہے، پانچ ہیں: (۱) توحید و رسالت کا اقرار (۲) نماز (۳) زکوٰۃ (۴) رمضان کے روزے (۵) حج۔
چنانچہ جس شخص کا ان پانچ ارکان پر صحیح اعتقاد و عمل ہے، وہ خالص مسلم ہے اور ان میں سے کسی ایک رکن کی نفی یا کسی ایک رکن کو یا سبھی ارکان کو تسلیم کرنے کے باوجود کلی ترک کر دینا، اسلام کے منافی اور ایسا شخص دائرۂ اسلام سے خارج ہے۔
یہ پانچ ارکان صحتِ اسلام کی شرط ہیں اور شرط کی عدم موجودگی میں مشروط (اسلام اور دخولِ جنت کا وعدہ) خود بخود ختم ہو جاتا ہے۔
➋ اکثر لوگ اسی غفلت کا شکار ہیں کہ توحید و رسالت کے اقرار سے جنت کا حصول ممکن ہے۔
یہ خام خیالی ہے۔
بلکہ دخولِ جنت کے لیے ان بنیادی ارکان کا اہتمام شرط ہے، بصورتِ دیگر کوتاہیِ عمل کی صورت میں خواہشات کا سراب ایسے کوتاہ عملوں کی آخرت برباد کر دے گا۔
لہٰذا نیت و عمل اور حیلوں بہانوں سے اسلام کے بنیادی ارکان سے انحراف کے بجائے، ان بنیادی ارکان پر مضبوطی سے کاربند رہنا چاہیے اور شیطانی بہکاووں اور چالوں میں آ کر اسلام سے ہاتھ نہ دھو بیٹھنا چاہیے۔
صحیح ابن خزیمہ شرح از محمد فاروق رفیع 309