🏠 👥 🔍 🧩 🅰️ 📌 ↩️

الشیخ محمد فاروق رفیع حفظہ اللہ
فوائد:
ان احادیث میں رکوع سے اٹھتے وقت کے سوا (نماز کے ہر رکن میں) اٹھتے اور جھکتے وقت تکبیر کہنے کا ثبوت ہے۔
البتہ رکوع سے اٹھتے وقت «سَمِعَ اللهُ لِمَنْ حَمِدَهُ» کہنا مشروع ہے۔
اس مسئلے پر موجودہ اور گزشتہ دور سے اجماع ثابت ہے۔
البتہ سیدنا ابو ہریرہ رضی اللہ عنہ کے زمانے میں اس مسئلہ میں اختلاف تھا۔
اس دور میں بعض لوگ تکبیر تحریمہ ہی کو مشروع خیال کرتے تھے اور کچھ لوگ اس سے کچھ تکبیروں میں اضافہ درست مانتے تھے۔
اس کی وجہ یہ تھی کہ انہیں رسول اللہ صلی اللہ علیہ وسلم کی سنت کا علم نہیں تھا۔
اسی لیے تو سیدنا ابو ہریرہ رضی اللہ عنہ نے کہا تھا کہ تمہاری نسبت میری نماز رسول اللہ صلی اللہ علیہ وسلم کی نماز کے زیادہ مشابہ ہے۔
سیدنا ابو ہریرہ رضی اللہ عنہ کی حدیث کے موافق عمل قرار پا چکا ہے۔
چنانچہ ہر دو رکعت نماز میں تکبیرات کی تعداد گیارہ ہے۔
اور یہ تعداد اس طرح ہے: تکبیر تحریمہ اور ہر رکعت میں پانچ تکبیرات (یوں دو رکعت نماز میں گیارہ تکبیرات بنتی ہیں)۔
تین رکعات نماز کی تکبیرات سترہ ہیں۔
یعنی تکبیر تحریمہ، تشہد سے اٹھتے وقت کی تکبیر اور ہر رکعت کی پانچ تکبیرات۔
اور چار رکعت نماز کی تکبیرات کی تعداد بائیس بنتی ہے۔
پانچ فرض نمازوں کی تکبیرات 94 چورانوے ہیں۔
نیز تکبیر تحریمہ واجب ہے اور باقی تکبیرات مسنون ہیں۔
بالفرض تکبیر تحریمہ کے سوا کوئی تکبیر ترک کی جائے تو نماز درست ہوگی، لیکن اس سے فضیلت اور سنت کی موافقت چھوٹ جائے گی۔
امام احمد بن حنبل رحمہ اللہ کے سوا تمام علماء کا یہی موقف ہے۔
◈ امام احمد بن حنبل رحمہ اللہ کا موقف ہے کہ تمام تکبیرات واجب ہیں۔
جمہور علماء کی دلیل یہ ہے کہ نبی صلی اللہ علیہ وسلم نے دیہاتی شخص کو نماز سکھائی اور اسے نماز کے تمام واجبات کی تعلیم دی تھی اور ان واجبات میں تکبیر تحریمہ بھی شامل ہے، تکبیر تحریمہ کے سوا آپ صلی اللہ علیہ وسلم نے کسی اور تکبیر کا ذکر نہیں کیا ہے اور یہ بیان کا وقت تھا اور اس سے تاخیر روا نہیں تھی۔
** [شرح النووي: 96/4-97] **
صحیح ابن خزیمہ شرح از محمد فاروق رفیع 582