🏠 👥 🔍 🧩 🅰️ 📌 ↩️

الشیخ محمد فاروق رفیع حفظہ اللہ
فوائد:
➊ مصنف نے ان احادیث سے یہ استدلال کیا ہے کہ غیر مقیم مسافر زیادہ سے زیادہ پندرہ دن تک رہنے کا قصد کر سکتا ہے اور کسی جگہ تین دن اور تین رات کی اقامت سے ٹھہرنے والا اتنے دن قصر کرے گا۔
اس سے زیادہ دن اقامت کا ارادہ ہو تو وہ پوری نماز پڑھے گا۔
مالک اور شافعی کا بھی یہی موقف ہے کہ چار دن اقامت کی نیت کرنے والا مسافر پوری نماز پڑھے گا۔
اس سے کم مدت اقامت کا ارادہ رکھنے والا قصر کرے گا۔
اور ابو حنیفہ کہتے ہیں کہ پندرہ دن اقامت کی نیت رکھنے والا مسافر پوری نماز پڑھے اور اس سے کم مدت کی اقامت کا ارادہ رکھنے والا قصر نماز ادا کرے۔ [فقه السنة: 272/1]
➋ مسافر جب تک مسافر ہو قصر کرے گا۔
اور جب وہ کسی کام کی غرض سے کہیں اقامت کرے تب بھی قصر کرے گا کیونکہ وہ مسافر ہی متصور ہوگا۔
خواہ وہ کئی سال اقامت کرے۔
لیکن مسافر اگر معینہ مدت کی اقامت کی نیت کرے تو قصر نماز ادا کرے یا پوری نماز پڑھے گا؟
◈ اس بارے میں ابن قیم رحمہ اللہ نے اس بات کو ترجیح دی ہے کہ اقامت طویل ہو یا مختصر بشرطیکہ وہ اقامت گاہ کو سکونت کا درجہ نہ دے تو وہ نماز قصر ہی کرے گا اور جب کسی جگہ کو مسافر رہائش و سکونت ٹھہرائے تو وہ مقیم بن جائے گا۔
اس صورت میں پوری نماز پڑھنا واجب ہے۔ [فقه السنة: 270/1]
➌ خلاصہ کلام یہ ہے کہ مسافر تردد و عدم تردد کی حالت میں نماز قصر ہی ادا کرے گا کیونکہ تردد و عدم تردد میں امتیاز کی کوئی واضح نص موجود نہیں۔
نبی صلی اللہ علیہ وسلم نے سفر میں ہمیشہ قصر نماز کا اہتمام کیا۔
نیز کوئی آیت، حدیث، اثر اور اجماع اس بات کی دلیل نہیں کہ معین مدت کی اقامت کا ارادہ ہو تو مسافر پوری نماز پڑھے اور حالتِ تردد میں ہو تو قصر کرے۔
لہذا راجح موقف یہی ہے کہ مسافر جب تک مسافر ہے اور اس کی سفری ضروریات پوری نہ ہوں وہ قصر کر سکتا ہے۔
صحیح ابن خزیمہ شرح از محمد فاروق رفیع 963