🏠 👥 🔍 🧩 🅰️ 📌 ↩️

الشیخ محمد فاروق رفیع حفظہ اللہ
فوائد:
➊ علماء کا اس مسئلہ میں اختلاف ہے کہ جب تمام اعمالِ صالحہ اللہ تعالیٰ کے لیے ہیں تو اللہ تعالیٰ نے روزے کو خاص کیوں کہا ہے۔ اس کے مفہوم کی کئی توجیہات ہیں:
(الف) روزوں کی اللہ تعالیٰ کی طرف اضافت کا سبب یہ ہے کہ اللہ تعالیٰ کے سوا کسی بھی معبودِ باطل کی روزوں کے ذریعے عبادت نہیں کی گئی۔
(ب) اعمال کی قبولیت کے لیے طلبِ ثواب کی نیت اہم شرط ہے۔ چنانچہ کسی بھی دور میں کفار نے اپنے معبودوں کی روزوں سے تعظیم نہیں کی۔ اس کے برعکس وہ نماز، سجود، صدقہ اور ذکر وغیرہ سے معبودانِ باطلہ کی تعظیم کرتے رہے ہیں۔ (اسی وجہ سے اللہ تعالیٰ نے روزوں کی اضافت اپنی ذات کی طرف کی ہے کہ روزہ میرے لیے ہے۔)
(ج) روزہ مخفی عبادت ہے، اس لیے یہ ریاء اور دکھاوے سے بعید ہے۔ جب کہ نماز، حج، جہاد اور صدقہ وغیرہ ظاہری عبادات ہیں اور ان میں ریاء کا عنصر شامل ہو سکتا ہے۔
(و) اللہ تعالیٰ نے روزوں کی نسبت اپنی طرف بطورِ خاص اس لیے کی ہے کہ روزے دار کا روزے میں ذاتی کوئی مفاد نہیں ہے۔
➋ ان احادیث میں روزہ کی فضیلت و ترغیب کا بیان ہے۔ [شرح النووي: 29/8]
➌ اللہ تعالیٰ کو روزہ دار کے منہ کی بو کستوری سے زیادہ پسند ہے۔ اور حالتِ روزہ میں منہ کی بو اللہ تعالیٰ کی رضا کا باعث ہے۔
➍ حالتِ روزہ میں مسواک کرنے کی کوئی پابندی نہیں اور مسواک کرنے سے منہ کی بو زائل نہیں ہوتی۔ کیونکہ حالتِ روزہ میں منہ کی بو معدہ خالی ہونے کی وجہ سے ہوتی ہے اور مسواک کرنے یا نہ کرنے سے یہ باقی رہتی ہے۔ لہذا ان احادیث سے دورانِ روزہ پچھلے پہر مسواک کو مکروہ قرار دینا کسی بھی اعتبار سے درست نہیں۔
➎ ◈ امام نووی رحمہ اللہ کہتے ہیں:
ان الفاظ میں کہ ”روزہ میرے لیے ہے اور میں ہی اس کی جزا دوں گا“، روزے کی فضیلت اور کثرتِ ثواب کا بیان ہے، کیونکہ جب اللہ تعالیٰ بتائے کہ وہ خود جزا دے گا، تو یہ الفاظ عطیہ و جزا کی قدرِ عظیم اور بہت زیادہ وسعت کے متقاضی ہوتے ہیں۔ [شرح النووي: 29/8]
صحیح ابن خزیمہ شرح از محمد فاروق رفیع 1900