🏠 👥 🔍 🧩 🅰️ 📌 ↩️

الشیخ محمد فاروق رفیع حفظہ اللہ
فوائد:
یہ احادیث دلیل ہیں کہ صرف تین آدمیوں کے لیے بھیک مانگنا حلال ہے۔ ان کے علاوہ دیگر اشخاص جو ان تین اوصاف سے متصف نہیں، ان کے لیے مانگنا اور ہاتھ پھیلانا جائز نہیں، کیونکہ جو شخص مال بڑھانے یا راحت طلبی کی خاطر بھیک مانگتا ہے اور لوگوں کے سامنے ہاتھ پھیلاتا ہے، اس کے بارے میں شریعت میں سخت وعید وارد ہوئی ہے۔
❀ سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«مَنْ سَأَلَ النَّاسَ تَكَثُّرًا، فَإِنَّمَا يَسْأَلُ جَمْرًا، فَلْيَسْتَقِلَّ لِيَسْتَكْثِرْ .»
”جو لوگوں سے مال بڑھانے کے لیے مانگتا ہے، وہ تو صرف آگ کا انگارا ہی طلب کرتا ہے، وہ اسے کم کرلے یا زیادہ کر لے۔“ [صحيح مسلم: 1041، سنن ابن ماجة: 1838]
❀ نیز صحیح مسلم میں ہے کہ رسول اللہ صلی اللہ علیہ وسلم نے فرمایا: ”مسلسل بھیک مانگنے والا روزِ قیامت اس حال میں آئے گا کہ اس کے چہرے پر گوشت کا ٹکڑا تک نہ ہوگا۔“ [صحيح مسلم: 1040]
لہٰذا بلا عذر اور بلا حاجت بھیک مانگنا یا لوگوں کے سامنے ہاتھ پھیلانا ناجائز و حرام ہے۔ فقط تین اشخاص مستثنیٰ ہیں جو ضرورت و حاجت کے وقت بھیک مانگ سکتے اور لوگوں سے مال کا مطالبہ کر سکتے ہیں۔
➊ وہ شخص جو کسی کا ضامن بنے۔ مثلاً فریقین میں قرض کے معاملے پر جھگڑا ہوا اور تیسرا شخص یہ کہہ کر صلح کرا دے کہ اگر مقروض نے فلاں تاریخ تک قرض نہ دیا تو میں اس کا ضامن ہوں۔ پھر متعلقہ تاریخ کو قرض ادا نہ ہونے کی صورت میں ضامن لوگوں سے رقم وصول کر کے قرض اتار سکتا ہے۔ ایسی صورت میں اس کے لیے لوگوں سے مانگنا جائز و مباح ہے۔
➋ ایسا شخص جو باغ کرائے پر لیتا ہے اور پھل پکنے کے وقت طوفان، آندھی یا کوئی آسمانی آفت باغ کا پھل ضائع کر دیتی ہے، تو اس صورت میں یہ اپنے نقصان کا ازالہ کرنے کے لیے لوگوں سے سوال کر سکتا ہے اور ایسے شخص کی مدد و اعانت کرنا جائز ہے۔
➌ فاقہ زدہ شخص جس کی فاقہ کشی پر تین سمجھدار افراد گواہی دیں، اسے مال دینا جائز ہے اور ایسا شخص صدقات و خیرات کا مستحق ہے۔
صحیح ابن خزیمہ شرح از محمد فاروق رفیع 2361