🏠 👥 🔍 🧩 🅰️ 📌 ↩️

الشیخ محمد فاروق رفیع حفظہ اللہ
فوائد:
➊ فطرانہ ادا کرنے کا آخری وقت نماز عید سے پہلے پہلے ہے۔ لہذا فطرانہ کی ادائیگی نماز عید ادا کرنے سے قبل ضروری ہے ورنہ وہ فطرانہ جو نماز عید کے بعد ادا کیا جائے، وہ ادا نہیں ہوگا۔
➋ عید الفطر سے ایک یا دو دن قبل فطرانہ ادا کرنا جائز ہے۔ یہ اس مقصد کے لیے ہے کہ فقراء و مساکین بھی فطرانہ سے ملنے والی رقم سے عید کے انتظامات کر سکیں۔ صدقہ فطر (فطرانہ) کی ادائیگی غلہ (گندم، جَو، کھجور، کشمش) کے بجائے نقد رقم کی صورت میں کرنے کا جواز شریعت مطہرہ، بالخصوص فقہ حنفی میں پوری طرح ثابت ہے۔ اس کا بنیادی مقصد غریبوں اور ضرورت مندوں کی عید کے دن حاجت روائی کرنا ہے۔
➌ نقد رقم سے فطرانہ ادا کرنے کے دلائل:
صدقہ فطر کا بنیادی مقصد (مقصدِ شریعت) نبی کریم صلی اللہ علیہ وسلم نے صدقہ فطر مقرر کرنے کا ایک اہم مقصد یہ بیان فرمایا ہے:
❀ «أَغْنُوهُمْ عَنْ طَوَافِ هَذَا الْيَوْمِ»
”ان (مساکین) کو آج (عید) کے دن مانگنے سے بے نیاز کر دو۔“ [سنن الدارقطني: 3/214]
غریبوں کو بے نیاز کرنے کا مقصد جس طرح غلہ دینے سے پورا ہوتا ہے، آج کے دور میں نقد رقم دینے سے یہ مقصد زیادہ بہتر اور آسانی سے پورا ہوتا ہے، کیونکہ غریب اپنی ضرورت کے مطابق اس رقم سے کپڑے، دوائی یا دیگر اشیاء خرید سکتا ہے۔
➍ حضرت معاذ بن جبل رضی اللہ عنہ کا عمل (قیمت کی ادائیگی کا اصول) جب رسول اللہ صلی اللہ علیہ وسلم نے حضرت معاذ بن جبل رضی اللہ عنہ کو یمن کا گورنر بنا کر بھیجا، تو انہوں نے اہل یمن سے زکوٰۃ کے حوالے سے فرمایا:
❀ «ائْتُونِي بِعَرْضٍ ثِيَابٍ خَمِيصٍ أَوْ لَبِيسٍ فِي الصَّدَقَةِ مَكَانَ الشَّعِيرِ وَالذُّرَةِ أَهْوَنُ عَلَيْكُمْ وَخَيْرٌ لِأَصْحَابِ النَّبِيِّ صَلَّى اللهُ عَلَيْهِ وَسَلَّمَ بِالْمَدِينَةِ»
”تم لوگ میرے پاس جَو اور مکئی (غلہ) کے بجائے کپڑے لے آؤ، یہ تمہارے لیے بھی زیادہ آسان ہے اور مدینہ میں نبی کریم صلی اللہ علیہ وسلم کے صحابہ کے لیے بھی زیادہ بہتر (مفید) ہے۔“ [صحيح البخاري: 3/312]
یہ حدیث اس بات کی صریح دلیل ہے کہ زکوٰۃ اور صدقاتِ واجبہ میں اصل چیز (غلہ) کے بجائے اس کے مساوی قیمت دینا جائز ہے، خصوصاً جب اس میں دینے والے کے لیے آسانی اور فقیر کا زیادہ فائدہ ہو۔
➎ تابعین اور سلف صالحین کا تعامل:
صحابہ کرام اور تابعین کے دور میں دراہم (نقد رقم) کے ذریعے فطرانہ ادا کرنے کے واضح ثبوت ملتے ہیں۔
حضرت حسن بصری رحمہ اللہ کا قول:
مصنف ابن ابی شیبہ میں مروی ہے کہ مشہور تابعی حضرت حسن بصری رحمہ اللہ فرماتے ہیں:
◈ «لَا بَأْسَ أَنْ تُعْطِيَ الدَّرَاهِمَ فِي صَدَقَةِ الْفِطْرِ»
”صدقہ فطر میں دراہم (نقد رقم) دینے میں کوئی حرج نہیں ہے۔“ [مصنف ابن أبي شيبة: 10371]
حضرت عمر بن عبد العزیز رحمہ اللہ کا فرمان:
خلیفہ راشد حضرت عمر بن عبد العزیز رحمہ اللہ نے باقاعدہ اپنے گورنروں کو تحریری حکم بھیجا کہ فطرانہ میں رقم وصول کی جائے:
◈ «فِي صَدَقَةِ الْفِطْرِ نِصْفُ صَاعٍ عَنْ كُلِّ إِنْسَانٍ أَوْ قِيمَتُهُ نِصْفُ دِرْهَمٍ»
”صدقہ فطر ہر انسان کی طرف سے آدھا صاع (گندم) ہے یا اس کی قیمت آدھا درہم ہے۔“ [مصنف ابن أبي شيبة: 10370]
حضرت ابو اسحاق سبیعی رحمہ اللہ کی گواہی:
◈ امام ابو اسحاق سبیعی فرماتے ہیں: ”میں نے لوگوں (یعنی صحابہ و تابعین) کو اس حال میں پایا کہ وہ رمضان کے صدقے میں طعام (غلے) کی قیمت کے طور پر دراہم دیا کرتے تھے۔“ [مصنف ابن أبي شيبة: 10369]
خلاصہ کلام:
احادیث مبارکہ، مقاصدِ شریعت اور صحابہ و تابعین کے عمل سے یہ بات واضح ہوتی ہے کہ صدقہ فطر میں غلے کے بجائے اس کی قیمت نقد رقم کی صورت میں دینا نہ صرف جائز ہے، بلکہ موجودہ دور میں فقراء کے حق میں زیادہ بہتر (انفع للفقراء) ہے تاکہ وہ اپنی مختلف ضروریات (راشن، لباس، علاج وغیرہ) باآسانی اور اپنی مرضی سے پوری کر سکیں۔
صحیح ابن خزیمہ شرح از محمد فاروق رفیع 2423