🏠 👥 🔍 🧩 🅰️ 📌 ↩️

الشیخ محمد فاروق رفیع حفظہ اللہ
فوائد:
➊ حجر اسود کو اسلام کے بعد بوسہ دینا اور اس پر سجدہ کرنا مستحب ہے، شافعیہ اور جمہور علماء کا یہی مذہب ہے۔
➋ سیدنا عمر بن خطاب رضی اللہ عنہ کا حجر اسود کو مخاطب کر کے یہ کہنا کہ ”تو محض ایک پتھر ہے اور تو نفع و نقصان کا مالک نہیں“، اس سے مقصود حجر اسود کو بوسہ دینے کے بارے میں رسول اللہ صلی اللہ علیہ وسلم کی اقتداء کی ترغیب دینا اور یہ باور کرانا تھا کہ اگر آپ صلی اللہ علیہ وسلم نے اسے بوسہ نہ دیا ہوتا تو وہ یہ عمل کبھی نہ کرتے۔
◈ نیز ان کلمات کہ ”حجر اسود نفع و نقصان کا مالک نہیں ہے“ سے مقصود یہ بھی تھا کہ بعض نو مسلم افراد، جن کے دلوں میں قبل از اسلام بتوں اور پتھروں کی عبادت کی شدید محبت، تعظیم، ان سے نفع کی امید اور ان کی تعظیم میں کوتاہی سے نقصان کا خوف لاحق تھا، انہیں اس سے آگاہ کرنا تھا کہ وہ اس سے بتوں کی عبادت کا دھوکہ نہ کھائیں، کیونکہ پتھر باقی مخلوقات کی طرح ایک مخلوق ہیں۔
یہ انسانوں کے نفع و نقصان کے بالکل مالک نہیں۔
نیز سیدنا عمر بن خطاب رضی اللہ عنہ نے اس عقیدے کی تشہیر موسمِ حج میں اس لیے کی کہ دیگر ممالک و بلاد سے آنے والے لوگ اس واقعے کے وقت حاضر ہوں اور مختلف علاقوں اور شہروں سے آنے والے لوگ ان کلمات کو یاد کر لیں (اور یہ پختہ عقیدہ بنا لیں کہ حجر اسود کا بوسہ سنتِ نبوی کی اقتداء میں ہے، اس کی عبادت ملحوظ نہیں)۔
اس میں ان لوگوں کا بھی رد ہے جو آج کل کچھ خاص قسم کے پتھر اپنے ہاتھوں میں ڈالتے ہیں اور سمجھتے ہیں کہ یہ پتھر ان کے لیے برکت کا باعث ہیں۔
حالانکہ وہ سوائے پتھروں کے اور کچھ نہیں ہیں اور یہ کسی کے لیے برکت اور خوش بختی کا باعث نہیں بن سکتے۔ [شرح النووي: 17/9]
صحیح ابن خزیمہ شرح از محمد فاروق رفیع 2711