امام طیالسی رحمہ اللہ نے ابن ابی ذئب سے اور انہوں نے صالح مولیٰ التوامہ سے روایت کیا کہ وہ بیان کرتے ہیں کہ میں نے ان جلیل القدر اصحابِ رسول کو پایا ہے جنہوں نے نبی کریم صلی اللہ علیہ وسلم اور سیدنا ابوبکر صدیق رضی اللہ عنہ کا عہدِ مبارک دیکھا تھا، ان کا عمل یہ تھا کہ جب وہ جنازہ پڑھنے کے لیے تشریف لاتے اور انہیں مسجد کے سوا کوئی اور جگہ میسر نہ ہوتی تو وہ واپس لوٹ جاتے اور مسجد کے اندر نمازِ جنازہ ادا نہ کرتے تھے۔
اسی طرح امام عبدالرزاق نے امام سفیان ثوری اور معمر کے واسطے سے صالح کا یہ مشاہدہ نقل کیا ہے کہ میں نے دیکھا کہ جب جنازہ مسجد میں رکھا جاتا اور سیدنا ابوہریرہ رضی اللہ عنہ کو مسجد کے علاوہ کہیں اور جگہ نماز کے لیے نہ ملتی تو وہ واپس تشریف لے جاتے اور مسجد میں اس جنازے پر نماز ادا نہیں فرماتے تھے۔ [المطالب العالية بزوائد المسانيد الثمانية/كِتَابُ الْجَنَائِزِ/حدیث: 882]