سیدنا ابو موسیٰ اشعری رضی اللہ عنہ سے روایت ہے کہ میں اور سیدنا ابو الدرداء رضی اللہ عنہ نبی کریم صلی اللہ علیہ وسلم کی خدمتِ اقدس میں موجود تھے تو آپ صلی اللہ علیہ وسلم نے ارشاد فرمایا: ”جس شخص نے اپنے دونوں جبڑوں کے درمیانی حصے (زبان) اور اپنی دونوں ٹانگوں کے درمیانی حصے (شرمگاہ) کی حفاظت کی، وہ جنت میں داخل ہو گیا۔“
اس حدیث کو امام بخاری نے اپنی تاریخ میں علی بن مدینی کے واسطے سے معلی بن منصور سے روایت کیا ہے، اور امام بخاری نے فرمایا کہ عبد الغفار یعنی ابن داؤد حرانی نے موسیٰ بن اعین سے اس سند کے ساتھ روایت کرتے ہوئے عقیل کا ذکر نہیں کیا، ان کی مراد یہ ہے کہ انہوں نے اسے سلیمان بن یسار کے واسطے سے براہِ راست سیدنا ابو موسیٰ رضی اللہ عنہ سے روایت کر دیا اور عقیل کو سند سے ساقط کر دیا ہے، لیکن ہم نے اسے ’فوائدِ تمام‘ میں ابوصالح حرانی (جو کہ عبد الغفار ہی ہیں) کے طریق سے عقیل کے ثبوت کے ساتھ روایت کیا ہے، اور اسی طرح امام خطیب بغدادی نے بھی اسے معافی بن سلیمان کے طریق سے موسیٰ بن اعین کے واسطے سے روایت کیا ہے۔ [المطالب العالية بزوائد المسانيد الثمانية/كِتَابُ الْأَدَبِ/حدیث: 2610]