ابواسماء رحمہ اللہ سے روایت ہے کہ سیدنا ابوبکر صدیق رضی اللہ عنہ رسول اللہ صلی اللہ علیہ وسلم کے ہمراہ دوپہر کا کھانا تناول فرما رہے تھے کہ اسی اثنا میں یہ آیات نازل ہوئیں: ﴿فَمَنْ يَعْمَلْ مِثْقَالَ ذَرَّةٍ خَيْرًا يَرَهُ ۝ وَمَنْ يَعْمَلْ مِثْقَالَ ذَرَّةٍ شَرًّا يَرَهُ﴾ [سورة الزلزلة: 7-8] یعنی ”پس جس نے ذرہ برابر نیکی کی ہوگی وہ اسے دیکھ لے گا، اور جس نے ذرہ برابر بدی کی ہوگی وہ (بھی) اسے دیکھ لے گا۔“ یہ سن کر سیدنا ابوبکر رضی اللہ عنہ نے (کھانے سے) ہاتھ روک لیا اور عرض گزار ہوئے: ”اے اللہ کے رسول! کیا ہم نے جو بھی برا کام کیا ہے ہم اس کا بدلہ دیکھ لیں گے؟“ تو آپ صلی اللہ علیہ وسلم نے ارشاد فرمایا: ”تمہیں (دنیا میں) جو بھی ایسی تکلیف پہنچتی ہے جسے تم ناپسند کرتے ہو، تو وہ انہی برائیوں کا بدلہ ہوتا ہے جو تمہیں (دنیا ہی میں) دے دیا جاتا ہے، جبکہ نیکیوں کا اجر ان کے مستحقین کے لیے آخرت میں ذخیرہ کر دیا جاتا ہے۔“
اسے امام احمد رحمہ اللہ نے اللہ تعالیٰ کے اس فرمان ﴿لَيْسَ بِأَمَانِيِّكُمْ وَلَا أَمَانِيِّ أَهْلِ الْكِتَابِ﴾ [سورة النساء: 123] کے متعلق ابوبکر بن ابی زہیر ثقفی کے واسطے سے سیدنا ابوبکر صدیق رضی اللہ عنہ سے ان الفاظ کے ہم معنی روایت کیا ہے۔ نیز امام ترمذی رحمہ اللہ نے اس کا کچھ حصہ سیدنا ابن عمر رضی اللہ عنہما کے طریق سے سیدنا ابوبکر صدیق رضی اللہ عنہ سے روایت کیا ہے۔ اس کی (بعض اسناد میں) ضعف ہے، البتہ وہ سند جسے ہم نے یہاں بیان کیا ہے وہ صحیح ہے بشرطیکہ ابواسماء کا سیدنا ابوبکر صدیق رضی اللہ عنہ سے سماع ثابت ہو جائے۔ [المطالب العالية بزوائد المسانيد الثمانية/كِتَابُ التَّفْسِيرِ/حدیث: 3782]