سیدنا رافع بن خدیج رضی اللہ عنہ سے روایت ہے کہ کسی غزوے میں رسول اللہ صلی اللہ علیہ وسلم کے ہمراہ انہیں ایک تیر پیوست ہو گیا، تو نبی کریم صلی اللہ علیہ وسلم نے ان سے ارشاد فرمایا: ”اے رافع! اگر تم چاہو تو میں تیر (کی لکڑی) نکال دوں اور اس کا پھل (لوہے کی نوک) تمہارے بدن میں ہی رہنے دوں، اور میں قیامت کے دن تمہارے حق میں گواہی دوں گا کہ تم شہید ہو۔“ رافع رضی اللہ عنہ بیان کرتے ہیں کہ پھر رسول اللہ صلی اللہ علیہ وسلم نے ویسا ہی کیا۔
اس کی تخریج امام طیالسی نے کی ہے، روایت کی سند میں یحییٰ بن عبدالحمید کی دادی کے مجہول ہونے کی وجہ سے ضعف ہے، تاہم دیگر شواہد کی بنا پر اس کی اصل موجود ہے۔ [المطالب العالية بزوائد المسانيد الثمانية/كِتَابُ الْمَنَاقِبِ/حدیث: 4057]