سیدنا جعدہ بن ہبیرہ رضی اللہ عنہ کہتے ہیں: نبی کریم صلی اللہ علیہ وسلم سے بنو عبدالمطلب کے ایک غلام کا ذکر کیا گیا جو مسلسل نماز پڑھتا اور سوتا نہیں، اور روزہ رکھتا اور افطار نہیں کرتا، تو آپ صلی اللہ علیہ وسلم نے فرمایا: ”میں نماز بھی پڑھتا ہوں اور سوتا بھی ہوں، روزہ بھی رکھتا ہوں اور افطار بھی کرتا ہوں، ہر عمل کا ایک جوش ہوتا ہے اور ہر جوش کے بعد ایک ٹھہراؤ آتا ہے، تو جس کا ٹھہراؤ سنت کی طرف ہو وہ ہدایت پا گیا، اور جس کا ٹھہراؤ اس کے سوا کسی اور طرف ہو وہ گمراہ ہو گیا۔“ [المعجم الكبير للطبراني/باب الجيم/حدیث: 2173]

سیدنا جعدہ بن ہبیرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”بہترین لوگ میرے زمانے کے لوگ ہیں، پھر وہ جو ان کے بعد آئیں گے، پھر وہ جو ان کے بعد آئیں گے، پھر وہ جو ان کے بعد آئیں گے، پھر اس کے بعد آنے والے سب سے کمتر ہوں گے۔“ [المعجم الكبير للطبراني/باب الجيم/حدیث: 2174]

سیدنا جعدہ بن ہبیرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”بہترین لوگ میرے زمانے کے لوگ ہیں، پھر وہ جو اس کے بعد آئیں گے، پھر اس کے بعد آنے والے سب سے کمتر ہوں گے۔“ [المعجم الكبير للطبراني/باب الجيم/حدیث: 2175]

سیدنا جعدہ بن ہبیرہ رضی اللہ عنہ کہتے ہیں: رسول اللہ صلی اللہ علیہ وسلم نے مجھے تین چیزوں سے منع فرمایا: سونے کی انگوٹھی پہننے سے، ریشمی (قسی) کپڑا پہننے سے، اور میثرہ (ریشمی زین پوش) استعمال کرنے سے۔ [المعجم الكبير للطبراني/باب الجيم/حدیث: 2176]