سیدنا کدیر ضبی رضی اللہ عنہ سے روایت ہے کہ ایک اعرابی نبی کریم صلی اللہ علیہ وسلم کے پاس آیا اور عرض کیا: مجھے ایسا عمل بتائیے جو مجھے جنت کے قریب اور جہنم سے دور کر دے۔ نبی کریم صلی اللہ علیہ وسلم نے فرمایا: ”کیا تجھے یہی دونوں باتیں فکرمند کیے ہوئے ہیں؟“ اس نے کہا: جی ہاں۔ آپ صلی اللہ علیہ وسلم نے فرمایا: ”انصاف کی بات کہو اور اپنے مال کا زائد حصہ دو۔“ اس نے کہا: اللہ کی قسم، میں ہر وقت انصاف کی بات نہیں کہہ سکتا، اور نہ اپنے مال کا زائد حصہ دے سکتا ہوں۔ آپ صلی اللہ علیہ وسلم نے فرمایا: ”کھانا کھلاؤ اور سلام عام کرو۔“ اس نے کہا: یہ بھی مشکل ہے۔ آپ صلی اللہ علیہ وسلم نے فرمایا: ”کیا تیرے پاس اونٹ ہیں؟“ اس نے کہا: جی ہاں۔ آپ صلی اللہ علیہ وسلم نے فرمایا: ”تو اپنے اونٹوں میں سے ایک اونٹ اور ایک مشک لے، پھر کسی ایسے گھرانے کا رخ کر جو وقفے وقفے سے پانی پیتے ہوں، اور انہیں پلا دے، شاید تیرا اونٹ نہ مرے اور نہ تیری مشک پھٹے یہاں تک کہ تیرے لیے جنت واجب ہو جائے۔“ تو وہ اعرابی تکبیر کہتا ہوا چل دیا، اور نہ اس کی مشک پھٹی نہ اونٹ مرا یہاں تک کہ وہ شہید کر دیا گیا۔ [المعجم الكبير للطبراني/باب الكاف/حدیث: 16471]