حکیم بن معاویہ رحمہ اللہ اپنے والد سیدنا معاویہ بن حیدہ رضی اللہ عنہ سے روایت کرتے ہیں کہ انہوں نے اپنے بھائی سیدنا مالک بن حیدہ رضی اللہ عنہ سے کہا: چلو ہمیں نبی کریم صلی اللہ علیہ وسلم کے پاس لے چلو، کیونکہ آپ صلی اللہ علیہ وسلم تمہیں پہچانتے ہیں مجھے نہیں پہچانتے، اور آپ صلی اللہ علیہ وسلم نے بنو بہدم کے کچھ لوگوں کو، جو میرے پڑوسی ہیں، روک رکھا ہے۔ چنانچہ وہ دونوں آپ صلی اللہ علیہ وسلم کی خدمت میں حاضر ہوئے تو مالک بن حیدہ رضی اللہ عنہ نے عرض کیا: یا رسول اللہ! میں اسلام لا چکا ہوں اور میرے پڑوسی بھی اسلام لا چکے ہیں، تو انہیں چھوڑ دیجیے۔ آپ صلی اللہ علیہ وسلم نے انہیں جواب نہ دیا، پھر انہوں نے بات دہرائی مگر آپ صلی اللہ علیہ وسلم نے جواب نہ دیا، پھر انہوں نے دوبارہ بات دہرائی مگر آپ صلی اللہ علیہ وسلم نے جواب نہ دیا، تو وہ غصے سے کھڑے ہو گئے اور کہا: اگر آپ نے یہ کیا تو لوگ یہ سمجھیں گے کہ آپ ایک بات کی دعوت دیتے ہیں اور خود اس کے خلاف کرتے ہیں، تو میں انہیں ڈانٹنے اور روکنے لگا، آپ صلی اللہ علیہ وسلم نے فرمایا: ”یہ کیا کہہ رہا ہے؟“ لوگوں نے کہا: یہ ایسا ایسا کہہ رہا ہے۔ آپ صلی اللہ علیہ وسلم نے فرمایا: ”اگر ایسا کیا گیا ہو تو اس کا بوجھ مجھ پر ہے، ان پر اس میں سے کچھ نہیں، اس کے پڑوسیوں کو چھوڑ دو۔“ [المعجم الكبير للطبراني/باب الميم/حدیث: 16713]