ابو قبیل، سیدنا معاویہ بن ابی سفیان رضی اللہ عنہ سے روایت کرتے ہیں کہ وہ جمعہ کے دن منبر پر چڑھے اور اپنے خطبے میں فرمایا: مال تو ہمارا مال ہے اور فے ہماری فے ہے، ہم جسے چاہیں گے دیں گے اور جسے چاہیں گے روک لیں گے۔ تو کسی نے انہیں جواب نہ دیا۔ جب دوسرا جمعہ آیا تو انہوں نے پھر ویسی ہی بات کہی، تو کسی نے انہیں جواب نہ دیا۔ جب تیسرا جمعہ آیا تو انہوں نے پھر وہی بات کہی، تو مسجد میں موجود لوگوں میں سے ایک شخص ان کی طرف کھڑا ہوا اور کہا: ہرگز نہیں! مال تو ہمارا مال ہے اور فے ہماری فے ہے، جو ہمارے اور اس کے درمیان حائل ہو گا ہم اپنی تلواروں کے ساتھ اس کا فیصلہ اللہ کے سپرد کریں گے۔ چنانچہ سیدنا معاویہ رضی اللہ عنہ منبر سے اترے اور اس شخص کو بلوا بھیجا اور اسے اندر لے گئے، تو لوگوں نے کہا: یہ شخص تو ہلاک ہو گیا۔ پھر لوگ اندر داخل ہوئے تو انہوں نے اس شخص کو سیدنا معاویہ رضی اللہ عنہ کے ساتھ تخت پر پایا، تو سیدنا معاویہ رضی اللہ عنہ نے لوگوں سے فرمایا: اس شخص نے مجھے زندہ کر دیا، اللہ اسے زندہ رکھے۔ میں نے رسول اللہ صلی اللہ علیہ وسلم کو فرماتے سنا: ”میرے بعد کچھ ایسے حکمران ہوں گے جو بات کریں گے لیکن انہیں جواب نہیں دیا جائے گا، وہ اس طرح جہنم میں گر پڑیں گے جیسے بندر ایک دوسرے کے اوپر گرتے ہیں۔“ اور میں نے پہلے جمعے میں بات کی تو کسی نے مجھے جواب نہ دیا، تو مجھے خدشہ ہوا کہ کہیں میں انہی میں سے نہ ہوں، پھر میں نے دوسرے جمعے میں بات کی تو پھر بھی کسی نے جواب نہ دیا، تو میں نے اپنے دل میں کہا: میں بھی انہی لوگوں میں سے ہوں، پھر میں نے تیسرے جمعے میں بات کی تو یہ شخص کھڑا ہوا اور اس نے مجھے جواب دیا، تو اس نے مجھے زندہ کر دیا، اللہ اسے زندہ رکھے۔ [المعجم الكبير للطبراني/باب الميم/حدیث: 16974]