سیدہ عائشہ رضی اللہ عنہا سے روایت ہے، فرماتی ہیں: اللہ کی قسم! میں نے رسول اللہ صلی اللہ علیہ وسلم کو اپنے حجرے کے دروازے پر کھڑے دیکھا جبکہ حبشی مسجد میں نیزوں سے کھیل رہے تھے، اور رسول اللہ صلی اللہ علیہ وسلم اپنی چادر سے مجھے چھپائے ہوئے تھے تاکہ میں آپ صلی اللہ علیہ وسلم کے دونوں کانوں اور کندھے کے درمیان سے ان کا کھیل دیکھ سکوں۔ پھر آپ صلی اللہ علیہ وسلم میری خاطر کھڑے رہتے یہاں تک کہ میں ہی (سیر ہو کر) واپس چلی جاتی۔ تو کم عمر، کھیل کود کی خواہشمند لڑکی کے شوق کا اندازہ لگا لو۔ [المعجم الكبير للطبراني/مسند النساء/حدیث: 19586]

سیدہ عائشہ رضی اللہ عنہا سے روایت ہے، فرماتی ہیں: میں نے رسول اللہ صلی اللہ علیہ وسلم کو اپنے حجرے کے دروازے پر کھڑے دیکھا جبکہ حبشی اپنے نیزوں سے مسجد میں کھیل رہے تھے، اور رسول اللہ صلی اللہ علیہ وسلم اپنی چادر سے مجھے چھپائے ہوئے تھے تاکہ میں ان کا کھیل دیکھ سکوں۔ آپ صلی اللہ علیہ وسلم میری خاطر کھڑے رہتے یہاں تک کہ میں ہی واپس چلی جاتی۔ تو اے میرے بھانجے! کم عمر، کھیل کود کی خواہشمند لڑکی کے شوق کا اندازہ لگاؤ۔ [المعجم الكبير للطبراني/مسند النساء/حدیث: 19587]

سیدہ عائشہ رضی اللہ عنہا سے روایت ہے، فرماتی ہیں: نبی کریم صلی اللہ علیہ وسلم نے میری ٹھوڑی اپنے کندھے پر رکھ لی تاکہ میں حبشیوں کا نیزہ بازی دیکھ سکوں، یہاں تک کہ میں ہی ان سے (نظر ہٹا کر) واپس جانے والی ہوتی۔ [المعجم الكبير للطبراني/مسند النساء/حدیث: 19588]