امیہ بن صفوان بن عبداللہ بن صفوان جمحی بیان کرتے ہیں: میں نے اپنے دادا عبداللہ بن صفوان کو ابن زبیر رضی اللہ عنہما کی خلافت کے دوران یہ کہتے سنا کہ میں نے حفصہ رضی اللہ عنہا کو یہ کہتے سنا کہ میں نے رسول اللہ صلی اللہ علیہ وسلم کو یہ فرماتے سنا: ”اس گھر (کعبہ) پر ضرور ایک لشکر چڑھائی کرے گا، یہاں تک کہ جب وہ بیداء نامی مقام پر پہنچیں گے تو ان کے درمیانی حصے کو زمین میں دھنسا دیا جائے گا، ان کا اگلا حصہ اپنے پچھلے حصے کو پکارے گا، مگر ان میں سے کوئی بھی باقی نہیں رہے گا سوائے اس بھاگنے والے کے جو ان کی خبر دے گا۔“ ایک شخص نے میرے دادا سے کہا: میں گواہی دیتا ہوں کہ آپ نے حفصہ رضی اللہ عنہا پر جھوٹ نہیں باندھا، اور نہ حفصہ رضی اللہ عنہا نے رسول اللہ صلی اللہ علیہ وسلم پر جھوٹ باندھا۔
سفیان بیان کرتے ہیں: عمیر بن قیس یہ حدیث امیہ کے حوالے سے بیان کیا کرتے تھے۔ [المعجم الكبير للطبراني/مسند النساء/حدیث: 19649]