سیدہ ام سلمہ رضی اللہ عنہا سے روایت ہے، فرماتی ہیں: رسول اللہ صلی اللہ علیہ وسلم سیدنا ابوسلمہ رضی اللہ عنہ کے پاس تشریف لائے تو ان کی نظر کھلی رہ گئی تھی، تو آپ صلی اللہ علیہ وسلم نے ان کی آنکھیں بند کر دیں اور فرمایا: ”جب روح قبض کی جاتی ہے تو نظر بھی اس کے پیچھے جاتی ہے۔“ اس پر ان کے گھر والوں میں سے کچھ لوگ چیخنے چلانے لگے، تو آپ صلی اللہ علیہ وسلم نے فرمایا: ”اپنے لیے صرف بھلائی کی دعا کرو، کیونکہ فرشتے تمہاری بات پر آمین کہتے ہیں۔“ پھر آپ صلی اللہ علیہ وسلم نے دعا فرمائی: ”اے اللہ! ابوسلمہ کو بخش دے اور ہدایت یافتہ لوگوں میں اس کا درجہ بلند فرما، اور باقی رہ جانے والوں میں اس کی اولاد میں اس کا نعم البدل بن، اور ہمیں اور اسے بخش دے، اے تمام جہانوں کے رب! اے اللہ! اس کی قبر کشادہ فرما دے اور اس میں اس کے لیے روشنی پیدا فرما۔“ [المعجم الكبير للطبراني/مسند النساء/حدیث: 20016]

سیدہ ام سلمہ رضی اللہ عنہا سے روایت ہے کہ نبی کریم صلی اللہ علیہ وسلم نے سیدنا ابوسلمہ رضی اللہ عنہ کی آنکھیں بند کر دیں۔ [المعجم الكبير للطبراني/مسند النساء/حدیث: 20017]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم سیدنا ابوسلمہ رضی اللہ عنہ کے پاس تشریف لائے، پھر (راوی نے) فزاری کی حدیث کی طرح واقعہ بیان کیا۔ [المعجم الكبير للطبراني/مسند النساء/حدیث: 20018]