سیدہ ام سلمہ رضی اللہ عنہا سے روایت ہے، وہ فرماتی ہیں: میں نے عرض کیا: یا رسول اللہ! عورتیں (اپنے کپڑے کس طرح لٹکائیں)؟ آپ صلی اللہ علیہ وسلم نے فرمایا: ”ایک بالشت لٹکا لیں۔“ میں نے عرض کیا: اس طرح تو ان کے (پاؤں) کھل جائیں گے۔ آپ صلی اللہ علیہ وسلم نے فرمایا: ”پھر ایک ہاتھ (تک) لٹکا لیں، اس سے زیادہ نہ بڑھائیں۔“ [المعجم الكبير للطبراني/مسند النساء/حدیث: 20218]

سیدہ ام سلمہ رضی اللہ عنہا سے روایت ہے کہ ایک عورت نے رسول اللہ صلی اللہ علیہ وسلم سے سوال کیا اور عرض کیا: یا رسول اللہ! مجھے استحاضہ کا خون آتا ہے، میں پاک نہیں ہوتی، تو کیا میں نماز چھوڑ دوں؟ آپ صلی اللہ علیہ وسلم نے فرمایا: ”نہیں، بلکہ اتنے دن اور راتیں نماز چھوڑ دو جتنے دن تمہیں حیض آیا کرتا تھا اور مہینے میں ان کی مقدار کے برابر، پھر غسل کرو، لنگوٹ باندھو اور نماز پڑھو۔“ [المعجم الكبير للطبراني/مسند النساء/حدیث: 20219]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم کے زمانے میں ایک عورت کو مسلسل خون آتا تھا، تو سیدہ ام سلمہ رضی اللہ عنہا نے اس کے بارے میں نبی کریم صلی اللہ علیہ وسلم سے استفسار کیا، تو آپ صلی اللہ علیہ وسلم نے فرمایا: ”وہ ان راتوں اور دنوں کی گنتی دیکھے جن میں اسے حیض آیا کرتا تھا اور اتنے دن نماز چھوڑ دے، پھر جب یہ (مدت) گزر جائے تو غسل کرے، کپڑے سے لنگوٹ باندھے اور نماز پڑھے۔“ [المعجم الكبير للطبراني/مسند النساء/حدیث: 20220]

سیدہ ام سلمہ رضی اللہ عنہا سے، وہ نبی کریم صلی اللہ علیہ وسلم سے (اسی موضوع پر) حدیث روایت کرتی ہیں۔ [المعجم الكبير للطبراني/مسند النساء/حدیث: 20221]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم کے زمانے میں ایک عورت کو مسلسل خون آتا تھا، تو سیدہ ام سلمہ رضی اللہ عنہا نے اس کے بارے میں نبی کریم صلی اللہ علیہ وسلم سے استفسار کیا، تو نبی کریم صلی اللہ علیہ وسلم نے فرمایا: ”وہ ان ایام اور راتوں کی گنتی دیکھے جن میں اسے حیض آیا کرتا تھا اس سے پہلے کہ اسے یہ (استحاضہ) لاحق ہوا، اور مہینے میں ان کی مقدار کے برابر، اور اسی قدر نماز چھوڑ دے، پھر جب یہ (مدت) گزر جائے اور نماز کا وقت آ جائے تو غسل کرے اور نماز پڑھے۔“ [المعجم الكبير للطبراني/مسند النساء/حدیث: 20222]