قیس بن ابی حازم رحمہ اللہ بیان کرتے ہیں کہ سیدنا سعد بن ابی وقاص رضی اللہ عنہ نے ہمیں نماز پڑھائی، وہ دو رکعتوں کے بعد (بیٹھے بغیر) کھڑے ہو گئے، ہم نے سبحان اللہ کہا، مگر وہ سیدھے کھڑے ہو گئے اور اپنے قیام کو جاری رکھا یہاں تک کہ نماز سے فارغ ہو گئے، پھر فرمایا: ”کیا تم یہ سمجھ رہے تھے کہ میں بیٹھ جاؤں گا؟ میں نے تو ویسے ہی کیا جیسے میں نے رسول اللہ صلی اللہ علیہ وسلم کو کرتے دیکھا۔“ ابو عثمان عمرو بن محمد الناقد رحمہ اللہ فرماتے ہیں: ”ہم نے ابو معاویہ کے سوا کسی کو اسے مرفوعاً بیان کرتے نہیں سنا۔“ [مسند أبي يعلى الموصلي/مُسْنَدُ سَعْدِ بْنِ أَبِي وَقَّاصٍ/حدیث: 759]

قیس بن ابی حازم رحمہ اللہ بیان کرتے ہیں کہ سیدنا سعد بن مالک رضی اللہ عنہ نے ہمیں نماز پڑھائی، پھر انہوں نے ابو معاویہ کی حدیث کی مانند ذکر کیا، مگر اس میں نبی کریم صلی اللہ علیہ وسلم کا ذکر نہیں کیا۔ [مسند أبي يعلى الموصلي/مُسْنَدُ سَعْدِ بْنِ أَبِي وَقَّاصٍ/حدیث: 760]

سیدنا سعد رضی اللہ عنہ نبی کریم صلی اللہ علیہ وسلم تک مرفوعاً روایت کرتے ہیں کہ آپ صلی اللہ علیہ وسلم نے فرمایا: ”مسلمانوں کے حق میں سب سے بڑا مجرم وہ مسلمان ہے جس نے کسی ایسی چیز کے بارے میں سوال کیا جو لوگوں پر حرام نہیں کی گئی تھی، پھر اس کے سوال کی وجہ سے وہ لوگوں پر حرام کر دی گئی۔“ [مسند أبي يعلى الموصلي/مُسْنَدُ سَعْدِ بْنِ أَبِي وَقَّاصٍ/حدیث: 761]

سیدنا سعد رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”مسلمانوں میں سب سے بڑا مجرم وہ ہے جس نے کسی ایسی چیز کے بارے میں سوال کیا جو لوگوں پر حرام نہیں کی گئی تھی، پھر اس کے سوال کی وجہ سے وہ حرام کر دی گئی۔“ [مسند أبي يعلى الموصلي/مُسْنَدُ سَعْدِ بْنِ أَبِي وَقَّاصٍ/حدیث: 762]

سیدنا سعد رضی اللہ عنہ سے نبی کریم صلی اللہ علیہ وسلم تک مرفوعاً اسی کے مانند روایت مروی ہے۔ [مسند أبي يعلى الموصلي/مُسْنَدُ سَعْدِ بْنِ أَبِي وَقَّاصٍ/حدیث: 763]

سیدنا سعد رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”مسلمانوں کے حق میں سب سے بڑا مجرم وہ مسلمان ہے جو کسی ایسی چیز کے بارے میں سوال کرے جو لوگوں پر حرام نہیں کی گئی تھی، پھر اس کے سوال کی وجہ سے وہ حرام کر دی گئی۔“ (امام سفیان بن عیینہ رحمہ اللہ نے فرمایا: ”مجھے یہ حدیث اسی طرح یاد ہے جیسے بسم اللہ الرحمن الرحیم یاد ہے۔“) [مسند أبي يعلى الموصلي/مُسْنَدُ سَعْدِ بْنِ أَبِي وَقَّاصٍ/حدیث: 764]

ابو عثمان نہدی رحمہ اللہ بیان کرتے ہیں کہ جب زیاد کو (ابو سفیان کی طرف) منسوب کیا گیا تو میں سیدنا ابو بکرہ رضی اللہ عنہ سے ملا اور کہا: ”یہ تم لوگوں نے کیا کیا؟“ انہوں نے کہا: میں نے سیدنا سعد رضی اللہ عنہ کو یہ بیان کرتے سنا: ”میرے کانوں نے سنا اور میرے دل نے محفوظ رکھا کہ نبی کریم صلی اللہ علیہ وسلم فرما رہے تھے: ”جس نے اسلام میں جانتے بوجھتے اپنے باپ کے سوا کسی اور کو باپ بنایا، اللہ نے اس پر جنت حرام کر دی۔““ سیدنا ابو بکرہ رضی اللہ عنہ نے فرمایا: ”اور میں نے بھی یہ رسول اللہ صلی اللہ علیہ وسلم سے سنا ہے۔“ [مسند أبي يعلى الموصلي/مُسْنَدُ سَعْدِ بْنِ أَبِي وَقَّاصٍ/حدیث: 765]

سیدنا سعد بن ابی وقاص رضی اللہ عنہ سے روایت ہے کہ رسول اللہ صلی اللہ علیہ وسلم فرمایا کرتے تھے: ”نہ ہامہ (الو کی نحوست) کی کوئی حقیقت ہے، نہ چھوت کی اور نہ بدشگونی کی۔ اگر کسی چیز میں نحوست ہوتی تو عورت، گھوڑے اور گھر میں ہوتی۔“ اور آپ صلی اللہ علیہ وسلم فرمایا کرتے تھے: ”جب کسی علاقے میں طاعون ہو تو وہاں نہ جاؤ، اور جب کسی علاقے میں طاعون پھیل جائے اور تم وہاں موجود ہو تو اس سے بھاگ کر نہ نکلو۔“ [مسند أبي يعلى الموصلي/مُسْنَدُ سَعْدِ بْنِ أَبِي وَقَّاصٍ/حدیث: 766]

سیدنا سعد رضی اللہ عنہ فرماتے ہیں: ”میں نے رسول اللہ صلی اللہ علیہ وسلم کو سیدنا عبداللہ بن سلام رضی اللہ عنہ کے سوا کسی کے بارے میں یہ فرماتے نہیں سنا کہ وہ اہلِ جنت میں سے ہے۔“ [مسند أبي يعلى الموصلي/مُسْنَدُ سَعْدِ بْنِ أَبِي وَقَّاصٍ/حدیث: 767]

سیدنا سعد رضی اللہ عنہ سے روایت ہے کہ ایک دیہاتی نبی کریم صلی اللہ علیہ وسلم کی خدمت میں حاضر ہوا اور عرض کیا: ”اے اللہ کے نبی! مجھے کوئی کلام سکھا دیجیے جو میں پڑھا کروں۔“ فرمایا: ”کہو: «لَا إِلَهَ إِلَّا اللَّهُ وَحْدَهُ لَا شَرِيكَ لَهُ، اللَّهُ أَكْبَرُ كَبِيرًا، وَالْحَمْدُ لِلَّهِ كَثِيرًا، وَسُبْحَانَ اللَّهِ رَبِّ الْعَالَمِينَ، لَا حَوْلَ وَلَا قُوَّةَ إِلَّا بِاللَّهِ الْعَزِيزِ الْحَكِيمِ» ”اللہ کے سوا کوئی معبود نہیں، وہ اکیلا ہے، اس کا کوئی شریک نہیں، اللہ سب سے بڑا ہے بہت بڑا، اور اللہ کے لیے بہت زیادہ تعریف ہے، اور اللہ پاک ہے جو تمام جہانوں کا رب ہے، گناہ سے بچنے کی طاقت اور نیکی کرنے کی قوت صرف اللہ غالب و حکمت والے کی توفیق سے ہے۔““ اس نے عرض کیا: ”یہ تو میرے رب کے لیے ہیں، میرے لیے کیا ہے؟“ فرمایا: ”کہو: «اللَّهُمَّ اغْفِرْ لِي، وَارْحَمْنِي، وَاهْدِنِي، وَارْزُقْنِي، وَعَافِنِي» ”اے اللہ! مجھے بخش دے، مجھ پر رحم فرما، مجھے ہدایت دے، مجھے رزق عطا فرما اور مجھے عافیت دے۔““ [مسند أبي يعلى الموصلي/مُسْنَدُ سَعْدِ بْنِ أَبِي وَقَّاصٍ/حدیث: 768]