سیدنا ابوحرہ رقاشی کے چچا رضی اللہ عنہ سے روایت ہے کہ انہوں نے بیان کیا: ”میں حجۃ الوداع کے موقع پر ایامِ تشریق کے درمیانی دنوں میں رسول اللہ صلی اللہ علیہ وسلم کی اونٹنی کی مہار تھامے ہوئے تھا، تو آپ صلی اللہ علیہ وسلم نے اپنے ارشاداتِ مبارکہ کے دوران فرمایا: «يَا أَيُّهَا النَّاسُ إِنَّ كُلَّ رِبًا مَوْضُوعٌ، وَإِنَّ أَوَّلَ رِبًا يُوضَعُ رِبَا الْعَبَّاسِ بْنِ عَبْدِ الْمُطَّلِبِ، لَكُمْ رُءُوسُ أَمْوَالِكِمْ لَا تَظْلِمُونَ وَلَا تُظْلَمُونَ» ”اے لوگو! یقیناً ہر قسم کا سود کالعدم قرار دے دیا گیا ہے، اور سب سے پہلا سود جسے میں ساقط کرتا ہوں وہ سیدنا عباس بن عبدالمطلب رضی اللہ عنہ کا سود ہے، تمہارے لیے تمہارے اصل اموال (کی واپسی) ہے، نہ تم کسی پر زیادتی کرو اور نہ تم پر زیادتی کی جائے۔““ [مسند أبي يعلى الموصلي/مُسْنَدُ عَمِّ أَبِي حَرَّةَ الرَّقَاشِيِّ/حدیث: 1569]

سیدنا ابو حرہ رقاشی کے چچا رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”کسی بھی مسلمان شخص کا مال اس کی دلی خوشی اور طیبِ خاطر کے بغیر (کسی دوسرے کے لیے) حلال نہیں ہے۔“ [مسند أبي يعلى الموصلي/مُسْنَدُ عَمِّ أَبِي حَرَّةَ الرَّقَاشِيِّ/حدیث: 1570]