رسول اللہ صلی اللہ علیہ وسلم کے ایک صحابی رضی اللہ عنہ سے روایت ہے کہ بکر بن عبد اللہ رحمہ اللہ، الحکم الاعرج رحمہ اللہ اور حاجب بن عمر رحمہ اللہ کے مابین اس معاملے پر تذکرہ ہوا کہ میت کو زندوں کے رونے کی وجہ سے عذاب دیا جاتا ہے۔ سیدنا ابوہریرہ رضی اللہ عنہ اس رائے کے مخالف تھے، چنانچہ ایک شخص نے کہا: ”اللہ کی قسم! اگر کوئی شخص اللہ کی راہ میں جہاد کے لیے نکلے، پھر زمین کے کسی خطے میں شہید کر دیا جائے، پھر کوئی عورت حماقت یا جہالت کی بنا پر اس پر بین کرے، تو اس نادان عورت کے رونے کی وجہ سے اس شہید کو ضرور عذاب دیا جائے گا۔“ اس پر ایک شخص نے کہا: ”رسول اللہ صلی اللہ علیہ وسلم نے سچ فرمایا اور ابوہریرہ نے غلطی کی، رسول اللہ صلی اللہ علیہ وسلم نے سچ فرمایا اور ابوہریرہ نے غلطی کی۔“ [مسند أبي يعلى الموصلي/مُسْنَدُ سَفِينَةَ رَجُلٌ/حدیث: 1592]