سیدنا عقیل بن ابی طالب رضی اللہ عنہ سے روایت ہے کہ قریش ابو طالب کے پاس آئے اور کہنے لگے کہ ”آپ کا بھتیجا ہمیں ہماری محفلوں اور ہماری مسجد میں اذیت پہنچاتا ہے، لہذا انہیں اس سے روک دیجیے“، اس پر ابو طالب نے کہا کہ ”اے عقیل! محمد ( صلی اللہ علیہ وسلم ) کو میرے پاس بلا لاؤ“، چنانچہ میں گیا اور آپ صلی اللہ علیہ وسلم کو لے آیا، تب ابو طالب نے کہا کہ ”اے میرے بھتیجے! تمہارے چچا زاد بھائیوں کا گمان ہے کہ تم انہیں ان کی مجلسوں اور ان کی مسجد میں تکلیف پہنچاتے ہو، لہذا تم اس سے باز آ جاؤ“، تب رسول اللہ صلی اللہ علیہ وسلم نے اپنی نظرِ مبارک آسمان کی طرف اٹھائی اور دریافت فرمایا ”کیا تم اس سورج کو دیکھ رہے ہو؟“ انہوں نے عرض کیا کہ ”جی ہاں“، تو آپ صلی اللہ علیہ وسلم نے فرمایا ”میں اس دعوت کو چھوڑنے پر اس سے زیادہ قدرت نہیں رکھتا جتنا کہ تم اس بات پر قادر ہو کہ میرے لیے اس سورج سے آگ کا ایک شعلہ روشن کر لاؤ“، یہ سن کر ابو طالب نے قریش سے کہا کہ ”میرے بھتیجے نے ہم سے کبھی جھوٹ نہیں بولا، لہذا تم لوگ واپس لوٹ جاؤ“۔ [مسند أبي يعلى الموصلي/حديث عقبل بن ابو طالب رضي الله عنه/حدیث: 6804]