قبیلہ خثعم کے ایک صحابی رضی اللہ عنہ سے روایت ہے کہ انہوں نے بیان کیا کہ میں نبی کریم صلی اللہ علیہ وسلم کی خدمت میں حاضر ہوا جبکہ آپ صلی اللہ علیہ وسلم اپنے صحابہ کی ایک جماعت میں تشریف فرما تھے، میں نے عرض کیا: ”کیا آپ ہی وہ شخصیت ہیں جن کا یہ دعویٰ ہے کہ آپ اللہ کے رسول ہیں؟“ آپ صلی اللہ علیہ وسلم نے ارشاد فرمایا: ”جی ہاں۔“ میں نے دریافت کیا: ”اے اللہ کے رسول صلی اللہ علیہ وسلم ! اللہ تعالیٰ کے نزدیک کون سا عمل سب سے زیادہ محبوب ہے؟“ آپ صلی اللہ علیہ وسلم نے فرمایا: ”اللہ پر ایمان لانا۔“ میں نے عرض کیا: ”اے اللہ کے رسول صلی اللہ علیہ وسلم ! پھر اس کے بعد کون سا؟“ آپ صلی اللہ علیہ وسلم نے فرمایا: ”پھر صلہ رحمی (رشتہ داروں کے ساتھ حسنِ سلوک) کرنا۔“ میں نے دریافت کیا: ”اے اللہ کے رسول صلی اللہ علیہ وسلم ! اللہ تعالیٰ کے نزدیک سب سے زیادہ ناپسندیدہ عمل کون سا ہے؟“ آپ صلی اللہ علیہ وسلم نے ارشاد فرمایا: ”اللہ کے ساتھ شریک ٹھہرانا۔“ میں نے پوچھا: ”اے اللہ کے رسول صلی اللہ علیہ وسلم ! پھر اس کے بعد کون سا؟“ آپ صلی اللہ علیہ وسلم نے فرمایا: ”پھر قطع رحمی (رشتہ ناطہ توڑنا)۔“ میں نے عرض کیا: ”اے اللہ کے رسول صلی اللہ علیہ وسلم ! پھر اس کے بعد کون سا؟“ آپ صلی اللہ علیہ وسلم نے ارشاد فرمایا: ”پھر برائی کا حکم دینا اور نیکی سے روکنا۔“ [مسند أبي يعلى الموصلي/حَدِيثُ رَجُلٍ مِنْ خَثْعَمَ لَمْ يُسَمَّ/حدیث: 6839]