شہر بن حوشب رحمہ اللہ بیان کرتے ہیں کہ ہم اشعریوں کے گروہ میں ایک صاحب تھے جنہوں نے رسول اللہ صلی اللہ علیہ وسلم کی صحبت اختیار کی تھی اور آپ صلی اللہ علیہ وسلم کے ہمراہ بہترین غزوات میں شریک رہے تھے، ان کا نام سیدنا مالک یا ابنِ مالک رضی اللہ عنہ (راوی کو نام میں شک ہے) تھا، وہ ایک روز ہمارے پاس تشریف لائے اور فرمایا: ”میں تمہارے پاس اس لیے آیا ہوں کہ تمہیں (دین) سکھاؤں اور تمہیں اسی طرح نماز پڑھاؤں جیسے رسول اللہ صلی اللہ علیہ وسلم ہمیں پڑھایا کرتے تھے“، پھر انہوں نے پانی کا ایک بڑا برتن منگوایا اور اس میں پانی ڈالا، پھر ایک چھوٹا برتن منگوایا اور اس چھوٹے برتن سے ہمارے ہاتھوں پر پانی ڈالنے لگے، پھر فرمایا: ”اب اچھی طرح مکمل وضو کرو“، چنانچہ لوگوں نے وضو کیا، پھر وہ کھڑے ہوئے اور ہمیں ایک مکمل مگر مختصر نماز پڑھائی، جب وہ نماز سے فارغ ہوئے تو فرمایا: رسول اللہ صلی اللہ علیہ وسلم نے ہمیں ارشاد فرمایا تھا کہ: ”میں ایسے لوگوں کو جانتا ہوں جو نہ تو انبیاء ہیں اور نہ ہی شہداء، مگر اللہ کے ہاں ان کے خاص مقام و مرتبہ کی وجہ سے انبیاء اور شہداء بھی ان پر رشک کریں گے“، تو مجمع کے ایک کنارے سے ایک اعرابی (دیہاتی) نے عرض کی—وہ صحابی کہتے ہیں کہ جب ہم رسول اللہ صلی اللہ علیہ وسلم کی خدمت میں حاضر ہوتے تو ہمیں یہ بات بہت پسند آتی تھی کہ ہمارے درمیان کوئی اعرابی موجود ہو کیونکہ وہ رسول اللہ صلی اللہ علیہ وسلم سے سوال کرنے کی جرات کر لیتے تھے جبکہ ہم جرات نہیں کر پاتے تھے—چنانچہ اس نے عرض کی: اے اللہ کے رسول! آپ ان کے اوصاف ہمیں بتا دیجیے؟ (راوی کہتے ہیں کہ) ہم نے دیکھا کہ رسول اللہ صلی اللہ علیہ وسلم کا چہرہ مبارک خوشی سے دمک اٹھا، آپ صلی اللہ علیہ وسلم نے ارشاد فرمایا: ”یہ وہ لوگ ہیں جو مختلف قبائل سے تعلق رکھتے ہیں اور محض اللہ کی خاطر ایک دوسرے سے محبت کرتے ہیں، اللہ کی قسم! ان کے چہرے سراپا نور ہوں گے اور وہ نور کے (بلند مقامات) پر ہوں گے، جب لوگ خوفزدہ ہوں گے تو انہیں کوئی خوف نہیں ہوگا اور جب لوگ غمزدہ ہوں گے تو وہ غمگین نہیں ہوں گے“۔ [مسند أبي يعلى الموصلي/حَدِيثُ مَالِكٍ أَوِ ابْنِ مَالِكٍ/حدیث: 6842]