سیدنا ابو زید رضی اللہ عنہ سے روایت ہے کہ ”رسول اللہ صلی اللہ علیہ وسلم نے ہمیں صبح کی نماز پڑھائی، پھر آپ صلی اللہ علیہ وسلم منبر پر رونق افروز ہوئے اور ہمیں خطاب فرمایا یہاں تک کہ ظہر کا وقت ہو گیا، پھر آپ صلی اللہ علیہ وسلم منبر سے نیچے تشریف لائے اور نماز ادا فرمائی، پھر دوبارہ منبر پر تشریف لے گئے اور ہمیں خطبہ دیا یہاں تک کہ عصر کا وقت ہو گیا، پھر آپ صلی اللہ علیہ وسلم منبر سے اترے اور نماز پڑھائی، پھر دوبارہ منبر پر جلوہ گر ہوئے اور ہمیں خطبہ ارشاد فرمایا یہاں تک کہ سورج غروب ہو گیا، پس آپ صلی اللہ علیہ وسلم نے ہمیں ان تمام امور کی خبر دے دی جو (ماضی میں) ہو چکے تھے اور جو (مستقبل میں) ہونے والے تھے، چنانچہ ہم میں سے سب سے زیادہ علم والا وہی شخص ہے جسے یہ ارشادات سب سے زیادہ یاد رہیں۔“ [مسند أبي يعلى الموصلي/حَدِيثُ أَبِي زَيْدٍ عَمْرِو بْنِ أَخْطَبَ/حدیث: 6845]

سیدنا ابو زید رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میرے قریب آؤ اور میری پشت پر ہاتھ پھیرو۔“ انہوں نے بیان کیا کہ پھر میں نے آپ صلی اللہ علیہ وسلم کی پشتِ مبارک سے کپڑا ہٹایا اور آپ کی پشت پر ہاتھ پھیرا، نیز میں نے مہرِ نبوت کو اپنی انگلیوں کے درمیان لے کر اسے دبایا۔ علباء بن احمر رحمہ اللہ بیان کرتے ہیں کہ ان سے دریافت کیا گیا کہ مہرِ نبوت کیا تھی؟ تو انہوں نے جواب دیا کہ ”وہ آپ صلی اللہ علیہ وسلم کے مبارک کندھے پر بالوں کا ایک گچھا تھا۔“ [مسند أبي يعلى الموصلي/حَدِيثُ أَبِي زَيْدٍ عَمْرِو بْنِ أَخْطَبَ/حدیث: 6846]

سیدنا ابوزید رضی اللہ عنہ سے روایت ہے کہ ”رسول اللہ صلی اللہ علیہ وسلم نے ان کے چہرے پر اپنا دستِ مبارک پھیرا اور ان کے حق میں حسن و جمال کی دعا فرمائی۔“ [مسند أبي يعلى الموصلي/حَدِيثُ أَبِي زَيْدٍ عَمْرِو بْنِ أَخْطَبَ/حدیث: 6847]