سیدنا اعشیٰ مازنی رضی اللہ عنہ سے روایت ہے کہ میں نبی کریم صلی اللہ علیہ وسلم کی خدمتِ اقدس میں حاضر ہوا اور آپ صلی اللہ علیہ وسلم کو یہ اشعار سنائے: ”اے تمام انسانوں کے مالک اور عرب کے منصف! میرا پالا ایک نہایت بدزبان اور شریر عورت سے پڑا ہے۔ میں رجب کے مہینے میں اس کے لیے خوراک کی تلاش میں نکلا تو اس نے میری غیر موجودگی میں نزاع اور لڑائی برپا کر دی۔ اس نے عہد کی خلاف ورزی کی اور (دھوکا دے کر) پیٹھ پھیر لی۔ اور یہ عورتیں ایسی شر ہیں جو ان پر غالب آنے کی کوشش کرنے والے پر بھی غالب آ جاتی ہیں۔“ چنانچہ نبی کریم صلی اللہ علیہ وسلم ان کلمات کو بطورِ تمثیل دہرانے لگے اور فرمانے لگے: ”اور وہ ایسی شر ہیں جو غالب آنے کی کوشش کرنے والے پر بھی غالب آ جاتی ہیں۔“ [مسند أبي يعلى الموصلي/حَدِيثُ الْأَعْشَى الْمَازِنِيِّ/حدیث: 6871]