سیدہ خدیجہ بنت خویلد رضی اللہ عنہا سے روایت ہے کہ انہوں نے رسول اللہ صلی اللہ علیہ وسلم سے سوال کیا اور عرض کی: ”میرے وہ بچے جو آپ صلی اللہ علیہ وسلم سے (پیدا ہوئے) تھے، وہ کہاں ہیں؟“ آپ صلی اللہ علیہ وسلم نے فرمایا: ”وہ جنت میں ہیں“، سیدہ رضی اللہ عنہا بیان کرتی ہیں کہ میں نے آپ صلی اللہ علیہ وسلم سے (دوبارہ) سوال کیا کہ میرے وہ بچے کہاں ہیں جو میرے (سابقہ) مشرک شوہروں سے تھے؟ تو آپ صلی اللہ علیہ وسلم نے ارشاد فرمایا: ”وہ آگ میں ہیں“، میں نے عرض کیا: ”بغیر کسی (برے) عمل کے ہی (دوزخ میں جائیں گے)؟“ تو آپ صلی اللہ علیہ وسلم نے فرمایا: ”اللہ تعالیٰ ان کے متعلق زیادہ بہتر جانتا ہے کہ وہ (اگر زندہ رہتے تو) کیا عمل کرنے والے تھے۔“ اس روایت کی سند میں سہل بن زیاد بصری رحمہ اللہ ثقہ راوی ہیں، تاہم انہیں اس بات میں شک ہوا ہے کہ ازرق بن قیس رحمہ اللہ نے یہ روایت عبداللہ بن نوفل رحمہ اللہ سے نقل کی ہے یا عبداللہ بن بریدہ رحمہ اللہ سے۔ [مسند أبي يعلى الموصلي/حَدِيثُ خَدِيجَةَ بِنْتِ خُوَيْلِدٍ رضي الله عنها، عَنِ النَّبِيِّ صَلَّى اللهُ عَلَيْهِ وَسَلَّمَ/حدیث: 7077]