ام المومنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم مجھ سے اکثر فرمایا کرتے تھے: ”اے عائشہ! تمہارے اشعار کا کیا بنا؟“ میں عرض کرتی: ”آپ کون سے اشعار کے بارے میں پوچھ رہے ہیں؟ وہ تو بہت سے ہیں، اے اللہ کے رسول!“ آپ صلی اللہ علیہ وسلم نے فرمایا: ”شکر کے بارے میں۔“ میں نے عرض کیا: ”جی ہاں، میرے ماں باپ آپ پر قربان!“ پھر انہوں نے سنایا کہ شاعر نے کہا:
”اپنے کمزور کو سہارا دو، کہیں ایسا نہ ہو کہ اس کی کمزوری کسی دن تمہیں بھی نقصان پہنچائے اور انجام تمہیں آ لے۔ وہ یا تو تمہیں بدلہ دے گا یا تمہاری تعریف کرے گا، اور جو شخص تمہارے کیے ہوئے احسان پر تمہاری تعریف کرے وہ اس کی طرح ہے جس نے بدلہ دے دیا۔ بے شک شریف آدمی سے جب تم تعلق جوڑنا چاہو تو اس کی رسی کو بوسیدہ اور اس کی گرہوں کو کمزور نہ پاؤ گے۔“ راوی کہتے ہیں: تو رسول اللہ صلی اللہ علیہ وسلم نے فرمایا: ”ہاں، اے عائشہ! جب اللہ تعالیٰ قیامت کے دن مخلوق کو جمع فرمائے گا تو اپنے ایک بندے سے، جس پر کسی دوسرے بندے نے احسان کیا ہوگا، پوچھے گا: ’کیا تم نے اس کا شکر ادا کیا؟‘ وہ عرض کرے گا: ’اے میرے رب! میں نے جان لیا تھا کہ یہ سب تیری طرف سے ہے، اس لیے میں نے تیرا شکر ادا کیا۔‘ اللہ تعالیٰ فرمائے گا: ’تو نے میرا شکر ادا نہیں کیا، کیونکہ تو نے اس شخص کا شکر ادا نہیں کیا جس کے ہاتھ پر میں نے یہ احسان جاری کیا تھا۔‘“

امام طبرانی رحمہ اللہ فرماتے ہیں: ”یہ حدیث مکحول سے صرف اسی سند سے مروی ہے، اس میں رواد بن جراح منفرد ہیں۔“ [المعجم الأوسط/بَابُ الذَّالِ/حدیث: 3580]