سیدنا بریدہ رضی اللہ عنہ سے روایت ہے کہ نبی کریم صلی اللہ علیہ وسلم جب کسی مہم یا بڑے لشکر کو روانہ فرماتے تو خاص طور پر اس کے امیر کو اپنے نفس کے معاملے میں تقویٰ الٰہی اختیار کرنے کی وصیت فرماتے اور اس کے ساتھ موجود مسلمانوں کے ساتھ خیر و بھلائی کی تلقین کرتے، پھر آپ صلی اللہ علیہ وسلم فرماتے: «اغْزُوا بِاسْمِ اللَّهِ قَاتِلُوا مَنْ كَفَرَ بِاللَّهِ، لَا تَغُلُّوا، وَلَا تَغْدِرُوا، وَلَا تُمَثِّلُوا، وَلَا تَقْتُلُوا وَلِيدًا» ”اللہ کے نام کے ساتھ جہاد کرو، اس سے قتال کرو جس نے اللہ کے ساتھ کفر کیا، تم مالِ غنیمت میں خیانت نہ کرنا، عہد شکنی نہ کرنا، مقتولین کے اعضاء نہ کاٹنا اور کسی بچے کو قتل نہ کرنا، جب تمہارا سامنا مشرکین میں سے اپنے دشمن سے ہو تو انہیں اسلام کی دعوت دو، اگر وہ اسے قبول کر لیں تو ان کی طرف سے اسے تسلیم کر لو اور ان سے باز رہو، پھر انہیں اپنے گھروں سے دارِ مسلمین کی طرف ہجرت کرنے کی دعوت دو، اگر وہ ایسا کر لیں تو اسے قبول کر لو، بصورتِ دیگر انہیں بتا دو کہ وہ دیہاتی مسلمانوں کی طرح ہوں گے جن پر اللہ کا وہی حکم جاری ہوگا جو عام مسلمانوں پر ہوتا ہے، لیکن فئے اور مالِ غنیمت میں ان کا کوئی حصہ نہ ہوگا، پھر اگر وہ اسلام سے انکار کریں تو ان سے جزیہ کا مطالبہ کرو، اگر وہ اسے تسلیم کر لیں تو اسے قبول کرو اور ان سے ہاتھ روک لو، اور جب تم کسی قلعے یا شہر کا محاصرہ کرو اور دشمن یہ چاہے کہ تم انہیں اللہ کے حکم پر اتارو (یعنی اللہ کے فیصلے کے مطابق صلح کرو) تو تم انہیں اللہ کے حکم پر نہ اتارنا، کیونکہ تمہیں نہیں معلوم کہ ان کے بارے میں اللہ کا اصل حکم کیا ہے، بلکہ تم انہیں اپنے فیصلے پر اتارو اور پھر ان کے بارے میں وہ فیصلہ کرو جو تم مناسب سمجھو، اور جب تم کسی محل کا محاصرہ کرو تو انہیں اللہ اور اس کے رسول کا ذمہ (عہد و پیمان) نہ دو بلکہ اپنا اور اپنے آباؤ اجداد کا ذمہ دو، کیونکہ تمہارا اپنے یا اپنے آباؤ اجداد کے عہد کو توڑ دینا اس سے کہیں ہلکا ہے کہ تم اللہ اور اس کے رسول کے عہد کی پامالی کرو“۔ [مسند أبي يعلى الموصلي/مسند بريدة/حدیث: 1413]