عبداللہ الصنابحی رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بے شک سورج جب طلوع ہوتا ہے تو اس کے ساتھ شیطان کا سینگ ہوتا ہے، پھر جب وہ (افق سے) بلند ہو جاتا ہے تو وہ اس سے جدا ہو جاتا ہے، پھر جب وہ استوا (آسمان کے عین وسط) کی حالت میں ہوتا ہے تو وہ اس کے ساتھ مل جاتا ہے، پھر جب وہ زوال پذیر ہوتا ہے تو وہ اس سے الگ ہو جاتا ہے، پھر جب وہ غروب کے قریب ہوتا ہے تو وہ (دوبارہ) اس کے ساتھ مل جاتا ہے اور جب وہ مکمل طور پر غروب ہو جاتا ہے تو وہ اس سے جدا ہو جاتا ہے“؛ چنانچہ رسول اللہ صلی اللہ علیہ وسلم نے ان اوقات میں نماز ادا کرنے سے منع فرمایا ہے۔ [مسند أبي يعلى الموصلي/مسند عبد الله الصنابحي/حدیث: 1451]

صنابحی رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میں (بروزِ قیامت) تمہارے ذریعے دیگر امتوں پر اپنی کثرتِ تعداد کا فخر کروں گا، لہٰذا میرے بعد کفر کی طرف اس طرح نہ پلٹ جانا کہ تم ایک دوسرے کی گردنیں مارنے لگو۔“ [مسند أبي يعلى الموصلي/مسند عبد الله الصنابحي/حدیث: 1452]

سیدنا صنابحی احمسی رضی اللہ عنہ سے روایت ہے کہ رسول اللہ صلی اللہ علیہ وسلم نے زکوٰۃ کے اونٹوں میں ایک نہایت عمدہ اونٹنی دیکھی تو (زکوٰۃ میں بہترین مال وصول کرنے پر ناپسندیدگی کا اظہار کرتے ہوئے) فرمایا: «قَاتَلَ اللَّهُ صَاحِبَ هَذِهِ النَّاقَةِ» ”اللہ اس اونٹنی کے مالک کو ہلاک کرے (یعنی اس نے یہ کیا کام کیا کہ بہترین مال وصول کر لیا)۔“ عرض کیا گیا: اے اللہ کے رسول صلی اللہ علیہ وسلم ! میں نے اسے صدقہ کے دو معمولی اونٹوں کے بدلے میں حاصل کیا ہے، تو آپ صلی اللہ علیہ وسلم نے ارشاد فرمایا: ”تب تو یہ درست ہے۔“ [مسند أبي يعلى الموصلي/مسند عبد الله الصنابحي/حدیث: 1453]

سیدنا صنابحی رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”بیشک میں حوضِ کوثر پر تمہارا پیش رو ہوں گا اور میں (روزِ قیامت) تمہاری کثرت کے باعث دیگر امتوں پر فخر کروں گا، پس میرے بعد ایک دوسرے کے ساتھ قتال نہ کرنا۔“ [مسند أبي يعلى الموصلي/مسند عبد الله الصنابحي/حدیث: 1454]

سیدنا صنابحی احمسی رضی اللہ عنہ سے روایت ہے کہ نبی کریم صلی اللہ علیہ وسلم سے ”اسی کے مثل“ (یعنی سابقہ حدیث کے ہم معنی) روایت مروی ہے۔ [مسند أبي يعلى الموصلي/مسند عبد الله الصنابحي/حدیث: 1455]