سیدنا محمود بن ربیع رضی اللہ عنہ سے روایت ہے کہ میں جب مدینہ آیا تو میری ملاقات سیدنا عتبان بن مالک رضی اللہ عنہ سے ہوئی، میں نے ان سے عرض کیا کہ مجھے آپ کے حوالے سے ایک حدیث پہنچی ہے، تو انہوں نے بیان کیا کہ ”میری بصارت میں کچھ خرابی پیدا ہوگئی تھی، چنانچہ میں نے رسول اللہ صلی اللہ علیہ وسلم کی خدمت میں پیغام بھیجا کہ میری دلی خواہش ہے کہ آپ میرے ہاں تشریف لائیں اور میرے گھر میں نماز ادا فرمائیں تاکہ میں اس مقام کو مستقل جائے نماز بنا لوں۔“ وہ بیان کرتے ہیں کہ ”پس نبی کریم صلی اللہ علیہ وسلم صحابہ کرام رضی اللہ عنہم کی ایک معتبر جماعت کے ہمراہ میرے پاس تشریف لائے اور میرے گھر میں داخل ہو کر نماز پڑھنے لگے، اس دوران صحابہ آپس میں گفتگو کرنے لگے اور پھر انہوں نے اپنی تمام تر گفتگو کا رخ سیدنا مالک بن دخشم رضی اللہ عنہ کی طرف موڑ دیا، وہ تمنا کر رہے تھے کہ کاش آپ صلی اللہ علیہ وسلم ان کے حق میں بددعا فرما دیتے اور وہ ہلاک ہو جاتے یا انہیں کوئی تکلیف دہ بیماری لاحق ہو جاتی۔ جب رسول اللہ صلی اللہ علیہ وسلم نماز سے فارغ ہوئے تو دریافت فرمایا: ”کیا وہ اس بات کی گواہی نہیں دیتا کہ «لَا إِلَهَ إِلَّا اللہُ، وَأَنِّي رَسُولُ اللہِ» ”اللہ کے سوا کوئی معبودِ برحق نہیں اور میں اللہ کا رسول ہوں“؟“ صحابہ نے عرض کیا کہ ”وہ یہ بات کہتے تو ہیں مگر یہ ان کے دل میں نہیں ہے۔“ تب آپ صلی اللہ علیہ وسلم نے ارشاد فرمایا: ”کوئی بھی ایسا بندہ نہیں ہے جو اس بات کی گواہی دے کہ «لَا إِلَهَ إِلَّا اللہُ، وَأَنِّي رَسُولُ اللہِ» ”اللہ کے سوا کوئی معبودِ برحق نہیں اور میں اللہ کا رسول ہوں“ اور پھر وہ آگ میں داخل ہو یا اسے آگ کھائے۔““ سیدنا محمود بن ربیع رضی اللہ عنہ فرماتے ہیں کہ ”مجھے یہ حدیث بہت پسند آئی تو میں نے اپنے بیٹے سے کہا کہ اسے لکھ لو، چنانچہ اس نے اسے تحریر کر لیا۔“ [مسند أبي يعلى الموصلي/مسند عتبان/حدیث: 1505]

سیدنا انس رضی اللہ عنہ سے مروی سیدنا عتبان بن مالک رضی اللہ عنہ کی روایت میں یہ اضافہ ہے کہ ”صحابہ کرام رضی اللہ عنہم آپس میں گفتگو کر رہے تھے اور ان تکالیف کا تذکرہ کر رہے تھے جو انہیں منافقین کی طرف سے پہنچتی تھیں، پھر انہوں نے اس معاملے کا بڑا حصہ سیدنا مالک بن دخشم رضی اللہ عنہ کی طرف منسوب کر دیا، راوی کہتے ہیں کہ وہ یہ تمنا کر رہے تھے کہ رسول اللہ صلی اللہ علیہ وسلم ان کے خلاف بددعا فرمائیں اور وہ آپ صلی اللہ علیہ وسلم کو اسی پر آمادہ کر رہے تھے، پھر جب رسول اللہ صلی اللہ علیہ وسلم (نماز سے) فارغ ہوئے تو آپ صلی اللہ علیہ وسلم نے اسی کے مانند تذکرہ فرمایا۔“ [مسند أبي يعلى الموصلي/مسند عتبان/حدیث: 1506]

سیدنا محمود بن ربیع رضی اللہ عنہ سے روایت ہے کہ انہوں نے سیدنا عتبان بن مالک رضی اللہ عنہ سے ملاقات کی تو انہوں نے ان سے ایک ایسی حدیث بیان کی جو انہیں بہت پسند آئی، جس پر انہوں نے اپنے بیٹے سے کہا کہ اسے لکھ لو، سیدنا عتبان بن مالک رضی اللہ عنہ (جو اپنی بصارت کھو چکے تھے) نے بیان کیا کہ میں نے عرض کی: ”اے اللہ کے نبی صلی اللہ علیہ وسلم ! کاش آپ میرے ہاں تشریف لاتے اور میرے گھر میں کسی جگہ نماز ادا فرماتے تاکہ میں اسے اپنی جائے نماز (مسجد) بنا لیتا“، چنانچہ رسول اللہ صلی اللہ علیہ وسلم تشریف لائے اور نماز پڑھانے لگے، اس دوران آپ صلی اللہ علیہ وسلم کے صحابہ رضی اللہ عنہم آپس میں گفتگو کرنے لگے اور ان تکلیفوں کا ذکر کرنے لگے جو انہیں منافقین سے پہنچتی تھیں، انہوں نے اس کا بڑا حصہ سیدنا مالک بن دخشم رضی اللہ عنہ کے سر تھوپ دیا، اور وہ یہ چاہ رہے تھے کہ نبی اکرم صلی اللہ علیہ وسلم ان کے خلاف بددعا فرمائیں اور وہ ہلاک ہو جائیں، انہوں نے عرض کی: ”اے اللہ کے نبی صلی اللہ علیہ وسلم ! ان کا معاملہ تو اس اس طرح سے ہے“، اللہ کے نبی صلی اللہ علیہ وسلم نے دریافت فرمایا: ”کیا وہ اس بات کی گواہی نہیں دیتا کہ اللہ کے سوا کوئی معبود نہیں اور محمد صلی اللہ علیہ وسلم اللہ کے رسول ہیں؟“، انہوں نے عرض کی: ”وہ یہ بات صرف اپنی زبان سے کہتا ہے اور اس کے دل میں اس کی کوئی حقیقت نہیں ہے“، تب اللہ کے نبی صلی اللہ علیہ وسلم نے ارشاد فرمایا: ”جو شخص بھی اس بات کی گواہی دے کہ اللہ کے سوا کوئی معبودِ برحق نہیں اور میں اللہ کا رسول ہوں، اللہ تعالیٰ اسے دوزخ کی آگ میں نہیں ڈالے گا - یا آپ صلی اللہ علیہ وسلم نے فرمایا - آگ اسے کبھی نہیں کھائے گی“۔ معتمر رحمہ اللہ نے بیان کیا کہ (سلیمان بن مغیرہ رحمہ اللہ نے) کہا: ”میں نے یہ حدیث سیدنا انس رضی اللہ عنہ سے سنی تھی اور انہوں نے یہ حدیث (اس سے پہلے) کسی سے بیان نہیں کی تھی“۔ [مسند أبي يعلى الموصلي/مسند عتبان/حدیث: 1507]