سیدنا ابو جمعہ رضی اللہ عنہ سے روایت ہے کہ انہوں نے بیان فرمایا کہ ”میں نے نبی اکرم صلی اللہ علیہ وسلم کے ہمراہ دوپہر کا کھانا کھایا اور ہمارے ساتھ سیدنا ابو عبیدہ بن جراح رضی اللہ عنہ بھی موجود تھے، تو سیدنا ابو عبیدہ رضی اللہ عنہ نے دریافت کیا کہ اے اللہ کے رسول! کیا کوئی ایسا بھی ہے جو ہم سے بہتر ہو؟ حالانکہ ہم آپ کے ساتھ اسلام لائے اور آپ کی رفاقت میں جہاد کیا، تو رسول اللہ صلی اللہ علیہ وسلم نے ارشاد فرمایا: ”ہاں، وہ لوگ جو میرے بعد ہوں گے، وہ مجھ پر ایمان لائیں گے حالانکہ انہوں نے مجھے دیکھا نہیں ہو گا۔““ [مسند أبي يعلى الموصلي/مسند أبي جمعة/حدیث: 1559]

سیدنا ابو جمعہ جنبذ بن سبع رضی اللہ عنہ سے روایت ہے کہ وہ فرماتے ہیں: ”میں نے دن کے ابتدائی حصے میں کفر کی حالت میں رسول اللہ صلی اللہ علیہ وسلم کے خلاف جنگ کی اور پھر اسی دن کے آخری حصے میں بحیثیتِ مسلمان آپ صلی اللہ علیہ وسلم کے ہمراہ ہو کر قتال کیا، ہم (اس وقت) تین مرد اور سات عورتیں تھے اور ہمارے ہی بارے میں یہ آیت نازل ہوئی: ﴿لَوْلَا رِجَالٌ مُؤْمِنُونَ وَنِسَاءٌ مُؤْمِنَاتٌ﴾ ”اگر ایسے بہت سے مومن مرد اور مومن عورتیں نہ ہوتیں“ (مکمل آیت تک)۔“ [مسند أبي يعلى الموصلي/مسند أبي جمعة/حدیث: 1560]

عون بن عبد اللہ رحمہ اللہ بیان کرتے ہیں کہ میری ملاقات ملکِ شام میں ایک بزرگ صحابی رضی اللہ عنہ سے ہوئی تو میں نے ان سے دریافت کیا کہ کیا آپ نے رسول اللہ صلی اللہ علیہ وسلم سے کچھ سنا ہے؟ انہوں نے جواب دیا کہ جی ہاں، میں نے آپ صلی اللہ علیہ وسلم کو یہ فرماتے ہوئے سنا: «اللَّهُمَّ اغْفِرْ لَنَا وَارْحَمْنَا» ”اے اللہ! ہمیں بخش دے اور ہم پر رحم فرما۔“ [مسند أبي يعلى الموصلي/مسند أبي جمعة/حدیث: 1561]

عبد خیر رحمہ اللہ سے روایت ہے کہ (عبدالملک بن سلع نے) ان سے دریافت کیا کہ آپ کی عمر کتنی ہو چکی ہے؟ انہوں نے جواب دیا: ”ایک سو بیس سال“، میں نے پوچھا: کیا آپ کو زمانہ جاہلیت کی کوئی بات یاد ہے؟ انہوں نے کہا: ”جی ہاں، ہم سرزمینِ یمن میں تھے کہ ہمارے پاس رسول اللہ صلی اللہ علیہ وسلم کا مکتوبِ گرامی موصول ہوا جس میں آپ صلی اللہ علیہ وسلم لوگوں کو خیرِ کثیر کی طرف دعوت دے رہے تھے، میرے والد ان لوگوں میں شامل تھے جو (اس دعوت کی قبولیت کے لیے) روانہ ہوئے جبکہ میں اس وقت بچہ تھا، پھر جب میرے والد واپس تشریف لائے تو انہوں نے میری والدہ سے فرمایا: ”اس ہنڈیا کے بارے میں حکم دو کہ اسے کتوں کے لیے بہا دیا جائے، کیونکہ ہم اسلام قبول کر چکے ہیں لہٰذا تم بھی اسلام قبول کر لو۔““ [مسند أبي يعلى الموصلي/مسند أبي جمعة/حدیث: 1562]