سیدنا عباس بن مرداس سلمی رضی اللہ عنہ سے روایت ہے کہ رسول اللہ صلی اللہ علیہ وسلم نے عرفہ کی شام اپنی امت کے لیے مغفرت اور رحمت کی دعا فرمائی اور کثرت سے الحاح و زاری کی، تو اللہ تعالیٰ نے آپ صلی اللہ علیہ وسلم کو جواب دیا کہ میں نے آپ کی امت کی مغفرت کر دی ہے سوائے ان مظالم کے جو انہوں نے ایک دوسرے پر کیے ہوں گے (یعنی حقوق العباد کے معاملات باقی رہیں گے)، اس پر آپ صلی اللہ علیہ وسلم نے دوبارہ بارگاہِ الٰہی میں التجا کی: «يَا رَبِّ، إِنَّكَ قَادِرٌ أَنْ تَغْفِرَ لِلظَّالِمِ وَتُثِيبَ الْمَظْلُومَ خَيْرًا مِنْ مَظْلَمَتِهِ» ”اے میرے رب! بے شک تو اس بات پر قدرت رکھتا ہے کہ ظالم کو بھی اپنی طرف سے بخش دے اور مظلوم کو اس کے ساتھ ہونے والی ناانصافی کے بدلے میں اس سے بہتر عطا فرما دے“، اس شام بس یہی معاملہ رہا، پھر جب اگلا دن ہوا اور مزدلفہ کی صبح ہوئی تو آپ صلی اللہ علیہ وسلم نے دوبارہ اپنی امت کے لیے وہی دعا مانگی، ابھی تھوڑی ہی دیر گزری تھی کہ نبی کریم صلی اللہ علیہ وسلم تبسم فرمانے لگے، آپ کے بعض صحابہ رضی اللہ عنہم نے عرض کیا: ”اے اللہ کے رسول! میرے ماں باپ آپ پر فدا ہوں، آپ ایک ایسے وقت میں تبسم فرما رہے ہیں جس میں آپ عموماً نہیں ہنستے تھے، آپ کو کس بات نے ہنسایا؟ اللہ تعالیٰ آپ کو ہمیشہ ہنستا مسکراتا رکھے“، آپ صلی اللہ علیہ وسلم نے فرمایا: ”میں اللہ کے دشمن ابلیس کی حالت دیکھ کر مسکرایا ہوں، جب اسے یہ علم ہوا کہ اللہ تعالیٰ نے میری امت کے بارے میں میری دعا قبول فرما لی ہے اور ظالم کی بھی مغفرت فرما دی ہے، تو وہ ہلاکت اور بربادی کی دہائیاں دیتا ہوا گرا اور اپنے سر میں مٹی ڈالنے لگا“، اور ایک روایت میں ہے کہ آپ صلی اللہ علیہ وسلم نے فرمایا: ”میں اس کی جزع فزع اور بے بسی پر ہنس پڑا“۔ [مسند أبي يعلى الموصلي/مسند العباس بن مرداس السلمي/حدیث: 1578]