ابو طلحہ خولانی رحمہ اللہ سے روایت ہے کہ وہ اہل فلسطین کی ایک جماعت کے ہمراہ سیدنا عمیر بن سعد رضی اللہ عنہ کے پاس آئے، جنہیں ان کی کمالِ فضیلت کی بنا پر ”نسیج وحدہ“ (یگانہ روزگار) کہا جاتا تھا، ہم ان کے گھر میں موجود ایک بڑے چبوترے پر بیٹھ گئے تو انہوں نے اپنے غلام سے کہا: ”اے غلام! گھوڑوں کو پانی پلاؤ۔“ راوی کہتے ہیں کہ گھر میں پتھر کا ایک حوض تھا، غلام نے عرض کیا: ”فلاں گھوڑی خارش زدہ ہے اور اس سے خون (یا شاید فرمایا پانی) ٹپک رہا ہے“، انہوں نے پھر حکم دیا: ”انہیں پانی پلاؤ۔“ اس پر حاضرین میں سے ایک شخص نے کہا: ”تب تو تمام گھوڑے خارش زدہ ہو جائیں گے“، سیدنا عمیر رضی اللہ عنہ نے فرمایا: ”انہیں پانی پلاؤ، کیونکہ میں نے رسول اللہ صلی اللہ علیہ وسلم کو یہ فرماتے ہوئے سنا ہے: «لَا عَدْوَى، وَلَا طِيَرَةَ، وَلَا هَامَةَ، أَلَمْ تَرَ إِلَى الْبَعِيرِ مِنَ الْإِبِلِ كَيْفَ يَكُونُ بِالصَّحْرَاءِ، ثُمَّ يُصْبِحُ فِي كَرْكَرَتِهِ أَوْ فِي مَرَاقِّهِ نُكْتَةٌ لَمْ تَكُنْ قَبْلَ ذَلِكَ، فَمَنْ أَعْدَى الْأَوَّلَ؟» ”بیماری کا اڑ کر لگنا، بدفالی لینا اور الو کی منحوسی (جیسی توہمات) کی کوئی حقیقت نہیں؛ کیا تم نے ریگستان میں موجود اونٹوں کو نہیں دیکھا کہ ان میں سے کسی کے سینے یا پیٹ کے نرم حصے پر اچانک خارش کا نشان ظاہر ہو جاتا ہے جو پہلے نہیں تھا، تو بھلا پہلے اونٹ کو کس نے بیماری لگائی تھی؟““ [مسند أبي يعلى الموصلي/مسند عمير بن سعد/حدیث: 1580]