سیدنا حسن بن علی رضی اللہ عنہما سے روایت ہے کہ ”نبی کریم صلی اللہ علیہ وسلم وضو فرما رہے تھے تو آپ صلی اللہ علیہ وسلم نے اپنی سجدہ گاہ (پیشانی) کو پانی سے دھویا یہاں تک کہ آپ صلی اللہ علیہ وسلم نے پانی کو سجدے کے مقام پر اچھی طرح بہا دیا“۔ [مسند أبي يعلى الموصلي/مسند الحسين بن علي بن أبي طالب/حدیث: 6782]

سیدنا حسین بن علی رضی اللہ عنہما سے روایت ہے کہ نبی کریم صلی اللہ علیہ وسلم نے ارشاد فرمایا: ”وہ شخص جو (خرید و فروخت میں) دھوکہ کھا جائے، وہ نہ تو (اپنی اس کمزوری پر) قابلِ تعریف ہوتا ہے اور نہ ہی وہ (اس مالی نقصان پر) کسی اجر و ثواب کا مستحق ٹھہرتا ہے۔“ [مسند أبي يعلى الموصلي/مسند الحسين بن علي بن أبي طالب/حدیث: 6783]

سیدنا حسین بن علی رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”سائل کا حق ہے، خواہ وہ گھوڑے پر سوار ہو کر (سوال کرنے) آئے“۔ [مسند أبي يعلى الموصلي/مسند الحسين بن علي بن أبي طالب/حدیث: 6784]

سیدنا حسین رضی اللہ عنہ سے روایت ہے (اور راوی کہتے ہیں کہ جہاں تک مجھے علم ہے انہوں نے اسے نبی کریم صلی اللہ علیہ وسلم ہی سے روایت کیا ہے) کہ آپ صلی اللہ علیہ وسلم نے ارشاد فرمایا: ”جو شخص کسی معاملے (برائی یا گناہ) کے وقت موجود ہو اور وہ اسے ناپسند کرے تو وہ اس شخص کی طرح (بری الذمہ) ہے جو وہاں موجود ہی نہ تھا، اور جو شخص کسی معاملے کے وقت موجود نہ ہو لیکن وہ اس پر (دل سے) راضی ہو جائے تو وہ اس شخص کی طرح (گناہ میں شریک) ہے جو وہاں موجود تھا۔“ [مسند أبي يعلى الموصلي/مسند الحسين بن علي بن أبي طالب/حدیث: 6785]

سیدنا حسن بن علی رضی اللہ عنہما سے روایت ہے کہ انہوں نے فرمایا: ”رسول اللہ صلی اللہ علیہ وسلم نے مجھے چند کلمات سکھائے جنہیں میں وتر کی دعاے قنوت میں پڑھا کروں: «رَبِّ اهْدِنِي فِيمَنْ هَدَيْتَ، وَعَافِنِي فِيمَنْ عَافَيْتَ، وَتَوَلَّنِي فِيمَنْ تَوَلَّيْتَ، وَبَارِكْ لِي فِيمَا أَعْطَيْتَ، وَقِنِي شَرَّ مَا قَضَيْتَ، فَإِنَّكَ تَقْضِي وَلَا يُقْضَى عَلَيْكَ، وَإِنَّكَ لَا تُذِلُّ مَنْ وَالَيْتَ، تَبَارَكْتَ رَبَّنَا وَتَعَالَيْتَ» ”اے میرے رب! مجھے ان لوگوں میں شامل فرما کر ہدایت دے جنہیں تو نے ہدایت عطا فرمائی، اور مجھے ان لوگوں میں شامل کر کے عافیت دے جنہیں تو نے عافیت بخشی، اور ان لوگوں میں شامل فرما کر میرا سرپرست بن جا جن کا تو سرپرست بنا، اور جو کچھ تو نے مجھے عطا فرمایا ہے اس میں میرے لیے برکت پیدا فرما، اور مجھے اس شر سے بچا لے جو تو نے مقدر فرمایا ہے، کیونکہ تو ہی فیصلہ فرماتا ہے اور تیرے خلاف کوئی فیصلہ نہیں کیا جا سکتا، اور یقیناً وہ شخص کبھی ذلیل نہیں ہو سکتا جس کا تو دوست بن جائے، اے ہمارے رب! تو نہایت بابرکت اور بہت بلند و برتر ہے۔““ [مسند أبي يعلى الموصلي/مسند الحسين بن علي بن أبي طالب/حدیث: 6786]