سیدنا ابو سعید بن معلی رضی اللہ عنہ سے روایت ہے کہ میں مسجد میں نماز پڑھ رہا تھا کہ رسول اللہ صلی اللہ علیہ وسلم نے مجھے پکارا تو میں نے آپ صلی اللہ علیہ وسلم کو جواب نہ دیا، پھر میں نے عرض کی: ”اے اللہ کے رسول! میں نماز پڑھ رہا تھا“، آپ صلی اللہ علیہ وسلم نے فرمایا: ”کیا اللہ تعالیٰ نے یہ نہیں فرمایا: ﴿اسْتَجِيبُوا لِلَّهِ وَلِلرَّسُولِ﴾ ”اللہ اور اس کے رسول کا حکم مانو جب وہ تمہیں پکاریں“؟“ پھر آپ صلی اللہ علیہ وسلم نے مجھ سے فرمایا: ”کیا میں تمہیں ایسی سورت نہ سکھاؤں جو قرآن کی سب سے عظیم سورت ہے؟“ پھر آپ صلی اللہ علیہ وسلم نے ارشاد فرمایا: ”وہ سورت «الْحَمْدُ لِلَّهِ رَبِّ الْعَالَمِينَ» ”سب تعریفیں اللہ ہی کے لیے ہیں جو تمام جہانوں کا پروردگار ہے“ ہے، یہی وہ سبع مثانی (بار بار دہرائی جانے والی سات آیات) اور قرآنِ عظیم ہے جو مجھے عطا کیا گیا ہے“۔ [مسند أبي يعلى الموصلي/حديث أبي سعيد بن المعلى/حدیث: 6837]