سیدنا مستورد بن شداد رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”ہر امت کے لیے ایک مقررہ میعاد ہے، اور میری امت کی (موجودہ نسل کی) میعاد سو سال ہے، پس جب میری امت پر سو سال کا عرصہ بیت جائے گا تو ان کے پاس وہ (فیصلہ) آ جائے گا جس کا اللہ عز وجل نے ان سے وعدہ کر رکھا ہے۔“ [مسند أبي يعلى الموصلي/حديث المستورد بن شداد/حدیث: 6857]

سیدنا مستورد رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”جس شخص نے کسی انسان کے عوض (یعنی اس کی غیبت کر کے یا اسے نقصان پہنچا کر) ایک لقمہ بھی کھایا تو اللہ تعالیٰ اسے جہنم کی آگ سے ویسا ہی لقمہ کھلائے گا، اور جس نے کسی انسان کے ذریعے (اسے ذلیل کر کے یا اس کے وسیلے سے ناجائز طور پر) کوئی لباس پہنا تو اللہ تعالیٰ اسے جہنم سے ویسا ہی لباس پہنائے گا، اور جو شخص کسی آدمی کے ذریعے شہرت اور دکھاوے کے مقام پر کھڑا ہوا (تاکہ اس کی آبرو ریزی کر کے اپنی ساکھ بنائے) تو اللہ تعالیٰ قیامت کے دن اسے ریاکاری اور دکھاوے کے مقام پر کھڑا کر کے رسوا کرے گا۔“ [مسند أبي يعلى الموصلي/حديث المستورد بن شداد/حدیث: 6858]