سیدنا عدی رضی اللہ عنہ سے روایت ہے کہ ان کے اور دو عورتوں کے درمیان پڑوس کا تعلق تھا، انہوں نے ان میں سے ایک کو پتھر مارا جس سے وہ جان بحق ہوگئی، چنانچہ وہ رسول اللہ صلی اللہ علیہ وسلم کی خدمت میں حاضر ہوئے جبکہ آپ صلی اللہ علیہ وسلم مقامِ تبوک میں تشریف فرما تھے، انہوں نے آپ صلی اللہ علیہ وسلم سے اس مقتولہ کے معاملے کے بارے میں دریافت کیا تو آپ صلی اللہ علیہ وسلم نے ارشاد فرمایا: ”تم اس کی دیت ادا کرو گے لیکن اس کے وارث نہیں بنو گے۔“ سیدنا عدی رضی اللہ عنہ بیان کرتے ہیں کہ گویا میں رسول اللہ صلی اللہ علیہ وسلم کو ایک ایسی سرخ اونٹنی پر سوار دیکھ رہا ہوں جس کا کان کٹا ہوا تھا، اس وقت آپ صلی اللہ علیہ وسلم نے فرمایا: ”اے لوگو! ہاتھ تین طرح کے ہوتے ہیں: اللہ کا ہاتھ سب سے بلند ہے، دینے والے کا ہاتھ درمیانہ ہے اور لینے والے کا ہاتھ سب سے نچلا ہے، پس تم (سوال کرنے سے) بچو خواہ لکڑیوں کے گٹھر جمع کر کے ہی کیوں نہ (گزر بسر کرنا پڑے)۔“ پھر آپ صلی اللہ علیہ وسلم نے اپنے دونوں دستِ مبارک بلند کیے اور عرض کیا: «اللَّهُمَّ بَلَّغْتُ» ”اے اللہ! میں نے (تیرا پیغام) پہنچا دیا ہے۔“ [مسند أبي يعلى الموصلي/حديث رجل من جذام يقال له: عدي/حدیث: 6859]