سیدنا سلمہ بن نفیل سکونی رضی اللہ عنہ سے روایت ہے کہ ہم اللہ کے نبی صلی اللہ علیہ وسلم کی مجلس میں بیٹھے ہوئے تھے کہ لوگوں میں سے ایک شخص آیا اور اس نے عرض کیا: ”اے اللہ کے نبی! کیا آپ کے پاس آسمان سے کھانا لایا گیا ہے؟“ آپ صلی اللہ علیہ وسلم نے فرمایا: ”ہاں، میرے پاس ایک گرم برتن میں کھانا لایا گیا۔“ اس نے دریافت کیا: کیا اس میں سے کچھ بچ بھی گیا تھا؟ آپ صلی اللہ علیہ وسلم نے فرمایا: ”ہاں۔“ اس نے عرض کیا: پھر اس بچے ہوئے کھانے کا کیا ہوا؟ آپ صلی اللہ علیہ وسلم نے فرمایا: ”اسے آسمان کی طرف اٹھا لیا گیا، اور مجھ پر یہ وحی کی جا رہی ہے کہ میں تمہارے درمیان بس تھوڑی ہی مدت رہوں گا، اور میرے بعد تم بھی تھوڑی ہی مدت رہو گے، پھر تم مختلف گروہ بن کر آؤ گے اور ایک دوسرے کو ہلاک کرو گے، اور قیامت سے پہلے موت کی ایک شدید لہر (وبا) آئے گی اور اس کے بعد زلزلوں کے سال ہوں گے۔“ [مسند أبي يعلى الموصلي/حديث سلمة بن نفيل/حدیث: 6861]