قبیلہ بلقین کے ایک صحابی رضی اللہ عنہ سے روایت ہے کہ میں رسول اللہ صلی اللہ علیہ وسلم کی خدمت میں اس وقت حاضر ہوا جب آپ وادیِ قریٰ میں تشریف فرما تھے، میں نے عرض کیا: ”اے اللہ کے رسول صلی اللہ علیہ وسلم ! آپ کو کن باتوں کا حکم دیا گیا ہے؟“ آپ صلی اللہ علیہ وسلم نے ارشاد فرمایا: ”مجھے یہ حکم دیا گیا ہے کہ تم سب اللہ کی عبادت کرو اور اس کے ساتھ کسی چیز کو شریک نہ ٹھہراؤ، اور یہ کہ تم نماز قائم کرو اور زکوٰۃ ادا کرو۔“ میں نے عرض کیا: ”اے اللہ کے رسول صلی اللہ علیہ وسلم ! یہ کون لوگ ہیں جن کے بارے میں فرمایا گیا ہے: ﴿الْمَغْضُوبِ عَلَيْهِمْ﴾ ؟“ آپ صلی اللہ علیہ وسلم نے ارشاد فرمایا: ”ان سے مراد یہودی ہیں۔“ میں نے عرض کیا: ”اور یہ کون لوگ ہیں جنہیں ﴿الضَّالِّينَ﴾ کہا گیا؟“ آپ صلی اللہ علیہ وسلم نے ارشاد فرمایا: ”ان سے مراد نصاریٰ ہیں۔“ میں نے عرض کیا: ”اے اللہ کے رسول صلی اللہ علیہ وسلم ! مالِ غنیمت کس کے لیے ہے؟“ آپ صلی اللہ علیہ وسلم نے ارشاد فرمایا: ”اللہ عزوجل کے لیے ایک حصہ ہے اور ان (مجاہدین) کے لیے چار حصے ہیں۔“ میں نے عرض کیا: ”کیا مالِ غنیمت میں کوئی شخص دوسرے سے زیادہ حقدار ہے؟“ آپ صلی اللہ علیہ وسلم نے ارشاد فرمایا: ”نہیں، یہاں تک کہ وہ تیر جسے تم میں سے کوئی اپنی ترکش سے نکالتا ہے، وہ اس کا بھی دوسرے سے زیادہ حقدار نہیں ہے۔“ [مسند أبي يعلى الموصلي/حديث رجل من بلقين/حدیث: 7179]