ام المومنین سیدہ عائشہ رضی اللہ عنہا سے روایت ہے کہ یزید مولیٰ سلمہ کی اہلیہ ام سلیمان نے ان سے قربانی کے گوشت کے بارے میں پوچھا تو انہوں نے فرمایا: ”سیدنا علی بن ابی طالب رضی اللہ عنہ ایک غزوے سے واپس آئے اور رسول اللہ صلی اللہ علیہ وسلم کی صاحبزادی سیدہ فاطمہ رضی اللہ عنہا کے ہاں گئے، تو ان کے سامنے قربانی کا گوشت پیش کیا گیا۔ انہوں نے اسے کھانے سے انکار کر دیا یہاں تک کہ رسول اللہ صلی اللہ علیہ وسلم سے دریافت کر لیں۔ چنانچہ انہوں نے رسول اللہ صلی اللہ علیہ وسلم سے پوچھا تو رسول اللہ صلی اللہ علیہ وسلم نے ان سے فرمایا: ”اسے ایک ذوالحجہ سے دوسرے ذوالحجہ تک کھاؤ۔““
امام طبرانی رحمہ اللہ فرماتے ہیں: ”یزید مولیٰ سلمہ بن اکوع کی اہلیہ ام سلیمان نے سیدہ عائشہ رضی اللہ عنہا سے اس حدیث کے سوا کوئی اور حدیث روایت نہیں کی، اس میں عمرو بن حارث منفرد ہیں۔“
دار الحرمین کے مطبوعہ نسخے میں اسی طرح ہے، اور غالباً درست ”ام سلیم“ ہے۔ [المعجم الأوسط/باب الطاء/حدیث: 3689]

مجاہد رحمہ اللہ سے روایت ہے کہ ایک آدمی سیدنا حسن اور سیدنا حسین رضی اللہ عنہما کے پاس آیا اور ان سے سوال کیا، تو ان دونوں نے فرمایا: ”سوال کرنا صرف تین قسم کے لوگوں کے لیے درست ہے: شدید تنگ دستی میں مبتلا شخص کے لیے، یا بھاری تاوان (دیت وغیرہ کی ضمانت) کے بوجھ تلے دبے شخص کے لیے، یا کمر توڑ دینے والے قرض والے کے لیے۔“ اور انہوں نے اسے عطا بھی کیا۔ پھر وہ شخص سیدنا ابن عمر رضی اللہ عنہما کے پاس آیا تو انہوں نے اسے دے دیا اور اس سے (اس کے حال کے بارے میں) کچھ نہیں پوچھا۔ اس شخص نے ان سے کہا: ”میں آپ کے دو چچا زاد بھائیوں کے پاس آیا تو انہوں نے مجھ سے (میرے حال کے بارے میں) سوال کیا، اور آپ نے مجھ سے کچھ نہیں پوچھا؟“ تو سیدنا ابن عمر رضی اللہ عنہما نے فرمایا: ”رسول اللہ صلی اللہ علیہ وسلم کے یہ دونوں نواسے تو علم کو اس طرح بھر بھر کر پلائے گئے ہیں جیسے پرندہ اپنے بچے کو چونچ سے دانہ بھرتا ہے۔“
امام طبرانی رحمہ اللہ فرماتے ہیں: ”یہ حدیث مجاہد سے یونس بن خباب کے سوا کسی نے روایت نہیں کی۔“ [المعجم الأوسط/باب الطاء/حدیث: 3690]