اللہ تعالیٰ کا ارشاد ہے: ”عنقریب لوگوں میں سے نادان کہیں گے کہ انہیں ان کے اس قبلے سے کس چیز نے پھیر دیا جس پر وہ پہلے کاربند تھے؟ آپ فرما دیجیے کہ مشرق اور مغرب سب اللہ ہی کا ہے، وہ جسے چاہتا ہے صراطِ مستقیم کی طرف ہدایت عطا فرماتا ہے، اور اسی طرح ہم نے تمہیں ایک معتدل اور بہترین امت بنایا تاکہ تم لوگوں پر گواہ بنو اور یہ رسول (ﷺ) تم پر گواہ ہوں، اور جس قبلے پر آپ پہلے تھے اسے ہم نے محض اس لیے مقرر کیا تھا تاکہ ہم (اعلاناً) جان لیں کہ کون رسول کی پیروی کرتا ہے اور کون اپنے الٹے پاؤں پھر جاتا ہے، اور بلاشبہ یہ بات بہت بھاری تھی مگر ان لوگوں پر نہیں جنہیں اللہ نے ہدایت بخشی، اور اللہ کی یہ شان نہیں کہ تمہارے ایمان (نمازوں) کو ضائع کر دے، بے شک اللہ لوگوں پر نہایت شفقت فرمانے والا اور رحم کرنے والا ہے، یقیناً ہم آپ کے چہرے کا بار بار آسمان کی طرف اٹھنا دیکھ رہے ہیں، سو ہم ضرور بالضرور آپ کو اس قبلے کی طرف پھیر دیں گے جسے آپ پسند کرتے ہیں، پس اب آپ اپنا رخ مسجدِ حرام کی طرف پھیر لیں، اور (اے مسلمانو!) تم جہاں کہیں بھی ہو اپنے چہرے اسی کی سمت پھیر لیا کرو، اور جن لوگوں کو کتاب دی گئی ہے وہ یقیناً جانتے ہیں کہ یہ ان کے رب کی طرف سے برحق ہے، اور اللہ ان کے کاموں سے غافل نہیں ہے“۔