اللہ تعالیٰ کا ارشاد کہ ”اور حج اور عمرہ کو اللہ کی رضا کے لیے مکمل کرو، پھر اگر تم (راستے میں) روک دیے جاؤ تو جو قربانی میسر ہو (وہ ذبح کرو) اور اپنے سر اس وقت تک نہ منڈواؤ جب تک کہ قربانی اپنے مقررہ مقام تک نہ پہنچ جائے، پھر تم میں سے جو کوئی بیمار ہو یا اس کے سر میں کوئی تکلیف (لاحق) ہو (جس کی وجہ سے سر پہلے منڈوانا پڑے) تو اس پر روزوں، یا صدقہ یا قربانی کا فدیہ لازم ہے، پھر جب تم امن کی حالت میں ہو جاؤ تو جو شخص عمرہ کر کے حج (تمتع) سے فائدہ اٹھائے تو اس پر وہ قربانی واجب ہے جو میسر ہو، اور جسے قربانی میسر نہ ہو وہ تین دن کے روزے حج کے دوران رکھے اور سات دن کے (روزے) اس وقت (رکھے) جب تم (حج سے) واپس لوٹو، یہ مکمل دس دن ہوئے، یہ حکم اس شخص کے لیے ہے جس کے اہل و عیال مسجدِ حرام (حدودِ حرم) کے رہنے والے نہ ہوں، اور اللہ کا تقویٰ اختیار کرو اور خوب جان لو کہ یقیناً اللہ تعالیٰ سخت عذاب دینے والا ہے“۔