حسن رحمہ اللہ بیان کرتے ہیں کہ سیدنا سمرہ بن جندب رضی اللہ عنہ نے فرمایا: ”کیا میں تمہیں ایسی حدیث نہ سناؤں جو میں نے رسول اللہ صلی اللہ علیہ وسلم سے بارہا سنی، سیدنا ابوبکر رضی اللہ عنہ سے بارہا سنی اور سیدنا عمر رضی اللہ عنہ سے بارہا سنی؟“ میں نے عرض کیا: ”کیوں نہیں!“ انہوں نے فرمایا: ”جس نے صبح اور شام کے وقت یہ کہا: «اللَّهُمَّ أَنْتَ خَلَقْتَنِي، وَأَنْتَ تَهْدِينِي، وَأَنْتَ تُطْعِمُنِي، وَأَنْتَ تَسْقِينِي، وَأَنْتَ تُمِيتُنِي، وَأَنْتَ تُحْيِينِي» ”اے اللہ! تو ہی نے مجھے پیدا کیا، تو ہی مجھے ہدایت دیتا ہے، تو ہی مجھے کھلاتا ہے، تو ہی مجھے پلاتا ہے، تو ہی مجھے موت دیتا ہے اور تو ہی مجھے زندگی بخشتا ہے“، تو وہ جس چیز کا بھی سوال کرے گا، اللہ تعالیٰ اسے وہی عطا فرمائے گا۔“
(حسن رحمہ اللہ) کہتے ہیں کہ پھر میں سیدنا عبداللہ بن سلام رضی اللہ عنہ سے ملا اور کہا: ”کیا میں آپ کو ایسی حدیث نہ سناؤں جو میں نے رسول اللہ صلی اللہ علیہ وسلم سے بارہا، سیدنا ابوبکر رضی اللہ عنہ سے بارہا اور سیدنا عمر رضی اللہ عنہ سے بارہا سنی ہے؟“ انہوں نے کہا: ”کیوں نہیں!“ چنانچہ میں نے انہیں یہی حدیث سنائی تو انہوں نے فرمایا: ”رسول اللہ صلی اللہ علیہ وسلم پر میرے ماں باپ قربان ہوں! یہ وہ کلمات ہیں جو اللہ عزوجل نے موسیٰ علیہ السلام کو عطا فرمائے تھے، وہ ہر روز سات مرتبہ ان کے ذریعے دعا کیا کرتے تھے، پس وہ اللہ عزوجل سے جس چیز کا بھی سوال کرتے اللہ تعالیٰ انہیں وہ ضرور عطا فرما دیتا۔“ [المعجم الأوسط/باب الألف/حدیث: 1028]