سیدنا بشیر بن خصاصیہ سدوسی رضی اللہ عنہ سے روایت ہے کہ انہوں نے فرمایا: ”میں رسول اللہ صلی اللہ علیہ وسلم کی خدمت میں حاضر ہوا تاکہ آپ صلی اللہ علیہ وسلم سے بیعت کروں، تو آپ صلی اللہ علیہ وسلم نے مجھ پر یہ شرائط عائد فرمائیں کہ: تم گواہی دو کہ اللہ کے سوا کوئی معبودِ برحق نہیں اور محمد صلی اللہ علیہ وسلم اس کے بندے اور رسول ہیں، پانچ وقت کی نماز پڑھو، رمضان کے روزے رکھو، زکوٰۃ ادا کرو، بیت اللہ کا حج کرو اور اللہ کی راہ میں جہاد کرو۔“
میں نے عرض کی: ”اے اللہ کے رسول صلی اللہ علیہ وسلم ! ان میں سے دو کام ایسے ہیں جن کی میں ہمت نہیں پاتا؛ اللہ کی قسم! میرے پاس صرف دس اونٹنیاں ہیں جو میرے گھر والوں کی غذا (دودھ) اور ان کی باربرداری کا واحد ذریعہ ہیں، اور رہا جہاد، تو لوگوں کا خیال ہے کہ جو (میدان سے) پیٹھ پھیر کر بھاگا وہ اللہ کے غضب کے ساتھ لوٹا، تو مجھے اندیشہ ہے کہ جب لڑائی کا وقت آئے تو میرا نفس بزدلی دکھائے اور میں موت کو ناپسند کروں۔“
پس رسول اللہ صلی اللہ علیہ وسلم نے اپنا دستِ مبارک سمیٹ لیا، پھر اسے حرکت دی اور فرمایا: ”نہ صدقہ و زکوٰۃ اور نہ ہی جہاد، تو پھر تم کس عمل کے ذریعے جنت میں داخل ہو گے؟“
(بشیر رضی اللہ عنہ فرماتے ہیں کہ) تب میں نے ان تمام شرائط پر آپ صلی اللہ علیہ وسلم سے بیعت کر لی۔ [المعجم الأوسط/باب الألف/حدیث: 1126]