سیدنا ابوذر غفاری رضی اللہ عنہ سے روایت ہے کہ انہوں نے فرمایا: ”میں نبی اکرم صلی اللہ علیہ وسلم کے پاس ایک مجلس میں حاضر تھا اور آپ صلی اللہ علیہ وسلم کے دستِ مبارک میں چند کنکریاں تھیں، پس ان کنکریوں نے آپ صلی اللہ علیہ وسلم کے ہاتھ میں تسبیح بیان کی۔ اس وقت ہم میں سیدنا ابوبکر، سیدنا عمر، سیدنا عثمان اور سیدنا علی رضی اللہ عنہم بھی موجود تھے اور مجلس میں موجود ہر شخص نے ان کنکریوں کی تسبیح سنی۔ پھر نبی اکرم صلی اللہ علیہ وسلم نے وہ کنکریاں سیدنا ابوبکر رضی اللہ عنہ کو دیں تو انہوں نے سیدنا ابوبکر رضی اللہ عنہ کے ہاتھ میں بھی تسبیح بیان کی جسے مجلس میں موجود ہر شخص نے سنا۔ پھر وہ کنکریاں نبی اکرم صلی اللہ علیہ وسلم کو واپس لوٹا دی گئیں تو انہوں نے (دوبارہ) آپ صلی اللہ علیہ وسلم کے ہاتھ میں تسبیح کہی۔ پھر نبی اکرم صلی اللہ علیہ وسلم نے وہ کنکریاں سیدنا عمر رضی اللہ عنہ کو عطا کیں تو انہوں نے ان کے ہاتھ میں تسبیح کی اور مجلس میں موجود ہر شخص نے اسے سنا۔ پھر نبی اکرم صلی اللہ علیہ وسلم نے وہ کنکریاں سیدنا عثمان بن عفان رضی اللہ عنہ کو دیں تو انہوں نے ان کے ہاتھ میں بھی تسبیح بیان کی۔ اس کے بعد آپ صلی اللہ علیہ وسلم نے وہ کنکریاں ہمیں دیں تو ہم میں سے کسی کے ہاتھ میں بھی انہوں نے تسبیح نہیں کی۔“
امام طبرانی رحمہ اللہ فرماتے ہیں: ”اس حدیث کو داود رحمہ اللہ سے صرف حمید رحمہ اللہ نے روایت کیا ہے، اور الجارودی رحمہ اللہ اسے اپنے والد سے روایت کرنے میں منفرد ہیں۔“ [المعجم الأوسط/باب الألف/حدیث: 1244]