سیدنا ابوقتادہ انصاری رضی اللہ عنہ اللہ تعالیٰ کے اس فرمان: ﴿يُثَبِّتُ اللهُ الَّذِينَ آمَنُوا بِالْقَوْلِ الثَّابِتِ فِي الْحَيَاةِ الدُّنْيَا وَفِي الآخِرَةِ﴾ کے متعلق فرماتے ہیں: ”بے شک مومن جب فوت ہو جاتا ہے تو اسے اس کی قبر میں بٹھایا جاتا ہے، پھر اس سے کہا جاتا ہے: تمہارا رب کون ہے؟ تو وہ کہتا ہے: اللہ میرا رب ہے۔ پھر اس سے کہا جاتا ہے: تمہارا نبی کون ہے؟ تو وہ کہتا ہے: محمد بن عبداللہ ( صلی اللہ علیہ وسلم ) ہیں۔ پھر اس پر یہی کلمات تین مرتبہ دہرائے جاتے ہیں۔“
امام طبرانی رحمہ اللہ فرماتے ہیں: ”اس حدیث کو ابو اسحاق رحمہ اللہ سے صرف یوسف رحمہ اللہ نے، اور یوسف رحمہ اللہ سے صرف ان کے بیٹے ابراہیم رحمہ اللہ نے روایت کیا ہے، جبکہ شریح رحمہ اللہ اسے نقل کرنے میں منفرد ہیں۔“ [المعجم الأوسط/باب الألف/حدیث: 1347]