امام حسن بصری رحمہ اللہ بیان کرتے ہیں کہ سیدنا انس بن مالک رضی اللہ عنہ نے انہیں خبر دی کہ رسول اللہ صلی اللہ علیہ وسلم جمعہ کے دن ایک لکڑی کے ستون سے اپنی پشتِ مبارک ٹیک لگا کر خطبہ ارشاد فرمایا کرتے تھے، پھر جب لوگوں کی تعداد زیادہ ہو گئی تو آپ صلی اللہ علیہ وسلم نے فرمایا: ”میرے لیے ایک منبر بناؤ۔“ چنانچہ انہوں نے آپ صلی اللہ علیہ وسلم کے لیے ایک منبر تیار کیا جو محض دو سیڑھیوں پر مشتمل تھا، پھر جب آپ صلی اللہ علیہ وسلم لکڑی کے اس ستون سے منبر کی طرف منتقل ہوئے تو وہ لکڑی (دردِ فراق میں) رونے لگی۔ سیدنا انس رضی اللہ عنہ فرماتے ہیں: ”اللہ کی قسم! میں نے اس لکڑی کے رونے کی ایسی آواز سنی جیسے اپنے بچے سے بچھڑ کر بے قرار ہونے والی اونٹنی بلکتی ہے، یہاں تک کہ رسول اللہ صلی اللہ علیہ وسلم منبر سے اس کی طرف اترے اور اسے اپنے گلے لگا لیا، تب وہ خاموش ہوئی۔“
امام حسن بصری رحمہ اللہ (یہ سن کر) فرماتے: ”اے اللہ کے مسلمان بندو! لکڑی تو رسول اللہ صلی اللہ علیہ وسلم کے لیے ان کے قرب کی وجہ سے شوق میں روتی ہے، تو کیا وہ لوگ جو آپ صلی اللہ علیہ وسلم سے ملاقات کی امید رکھتے ہیں اس بات کے زیادہ حقدار نہیں کہ وہ آپ صلی اللہ علیہ وسلم کا شوق رکھیں؟“
امام طبرانی رحمہ اللہ فرماتے ہیں: ”اس حدیث کو یزید بن ابراہیم رحمہ اللہ سے صرف حبان رحمہ اللہ نے روایت کیا ہے اور یحییٰ بن محمد رحمہ اللہ اس کی روایت میں منفرد ہیں۔“ [المعجم الأوسط/باب الألف/حدیث: 1408]