سیدنا براء بن عازب رضی اللہ عنہ سے روایت ہے کہ ایک دن رسول اللہ صلی اللہ علیہ وسلم تشریف لائے اور آپ صلی اللہ علیہ وسلم کے ہاتھ میں دو صحیفے تھے جنہیں آپ صلی اللہ علیہ وسلم ملاحظہ فرما رہے تھے۔ آپ صلی اللہ علیہ وسلم کے صحابہ رضی اللہ عنہم نے (آپس میں) کہا: ”اللہ کی قسم! اللہ کے نبی صلی اللہ علیہ وسلم تو امی ہیں، نہ پڑھتے ہیں نہ لکھتے ہیں (پھر ان صحیفوں میں کیا دیکھ رہے ہیں)۔“ یہاں تک کہ جب آپ صلی اللہ علیہ وسلم ان کے قریب تشریف لائے تو آپ صلی اللہ علیہ وسلم نے وہ صحیفہ کھولا جو آپ صلی اللہ علیہ وسلم کے دائیں ہاتھ میں تھا اور فرمایا: «بِسْمِ اللهِ الرَّحْمَنِ الرَّحِيمِ، هَذَا كِتَابٌ مِنَ الرَّحْمَنِ الرَّحِيمِ بِأَسْمَاءِ أَهْلِ الْجَنَّةِ، وَأَسْمَاءِ آبَائِهِمْ وَعَشَائِرِهِمْ، مُجْمِلٌ عَلَيْهِمْ، لَا يُزَادُ فِي آخِرِهِ شَيْئًا، فَرَغَ رَبُّكُمْ» ”اللہ کے نام سے جو نہایت مہربان اور بار بار رحم فرمانے والا ہے۔ یہ رحمن و رحیم کی جانب سے ایک نوشتہ ہے جس میں اہل جنت کے نام، ان کے آبا و اجداد اور ان کے قبیلوں کے نام درج ہیں، یہ ان کی مکمل تفصیل ہے، اس کے آخر میں اب کسی چیز کا اضافہ نہیں کیا جائے گا؛ تمہارا رب (فیصلوں سے) فارغ ہو چکا ہے۔“ پھر آپ صلی اللہ علیہ وسلم نے دوسرا صحیفہ کھولا جو آپ صلی اللہ علیہ وسلم کے دوسرے ہاتھ میں تھا اور وہ اہل جہنم کے متعلق تھا، تو آپ صلی اللہ علیہ وسلم نے اس کے بارے میں بھی اسی طرح (کے کلمات) فرمائے۔
امام طبرانی رحمہ اللہ فرماتے ہیں: ”یہ حدیث سیدنا براء رضی اللہ عنہ سے صرف اسی سند کے ساتھ مروی ہے اور اس کی روایت میں محمد بن جہضم رحمہ اللہ منفرد ہیں۔“ [المعجم الأوسط/باب الألف/حدیث: 1447]